КъМР-ни Парламентини кезиулю сессиясыны ахырында тюрлю-тюрлю сфералада жетишимле болдургъанланы, бет жарыкълы ишлегенлени саугъалау ариу тёреге айланнганды. Ма бу жол да каникуллагъа кетерден алгъа республиканы законла чыгъарыучу органында 80-ден аслам адамгъа, ала уа къырал къуллукълада ишлегенле, алимле, врачла, устазла, спорт школланы башчылары, энергетикле,  асламлы информация органлада ишлегенле эм кёп башха усталыкъланы келечилери эдиле, Парламентни Сыйлы грамотасы, Спикерни Ыразылыгъы берилгендиле. 

 

Жыйылгъанланы алгъышлай, Парламентни спикери Татьяна Егорова бюгюнлюкде Россейде къыйын, аны  бла бирге уа жууаплы ишле бардырылгъанларын чертгенди. «Къыралыбызны даражасы ёседи, экономика ышаннгылы айныйды,   промышленностьда, эл мюлкде алгъа атламла бардыла,   культурада, спортда да жетишимле уллудула. Ала уа бек алгъа адамларыбыз кеслерин аямай уруннганларыны, иш кёллюлюклерини хайырындандыла. Биз барыбыз да къыралыбызны даражасын кючлеуге, халкъны къолайлы жашауун жалчытыугъа къолдан келгенни этебиз»,-дегенди ол.

 

Татьяна Борисовна  Парламентни пленар кенгешлери бардырылгъан залында тюрлю-тюрлю усталыкъланы бла тёлюлени келечилери жыйылгъанларын, аланы да сайлагъан ишлерине сюймеклик, жууаплылыкъ,  бийик профессионализм бирикдиргенлерин чертгенди. «Сиз сайлагъан ишигизни усталарысыз, иш кёллюгюгюз бла коллегаларыгъызны, жамауатны хурметине тийишли болгъансыз. Барыбыз да бирге болсакъ, республиканы, къыралыбызны да кючлю, жетишимли, къолайлы да эталлыкъбыз. Сиз усталыгъыгъызгъа, граждан борчугъузгъа кертичиликни юлгюсюн кёргюзтесиз»,-деп къошханды ол.
Ызы бла саугъалау башланнганды. Алай бла КъМР-ни законла чыгъарыучу органыны Сыйлы грамотасына тийишли кёрюлгенлени  арасында жер эм ырысхы халла жаны бла министрни орунбасары Уяналаны Таймураз да бар эди. Ол экономиканы айнытыугъа салгъан къыйыны ючюн белгиленнгенди. Билим бериуде ишлегенлени уллу къаууму да саугъаланнгандыла, ол санда  жарыкъландырыу, илму эм жаш тёлюню ишлери жаны бла министрни орунбасары Геккиланы Солтан, ингилиз тилден устаз Герийланы Марина эм башхала.