Къабарты-Малкъарда Россельхозбанкны (РСХБ) бёлюмю буруннгу жылдан бери агропромышленный комлексде къармашханлагъа къырал программагъа кёре жылгъа беш процент тёлерча кредитле береди. Саулай айтханда, бюгюнлюкде тёрт жюз миллион сомгъа жууукъ берилгенди. Ол санда инвестициялы проектлеге 71 миллион сом.

Былтыр къырал программаны чеклеринде «Заря» эл мюлк предприятиягъа 70 миллион сомдан артыкъ кредит берилгенди. Андан 46 миллионну ол суу сугъаргъан машинала алгъанды. Дагъыда 24 миллиону сезон ишлени бардырыргъа отлукъгъа, семиртгичлеге эмда башха затлагъа къоратханды. Былтыр «Агроопторг» биригиу да ишлени заманында бардырырча 40 миллион сом кредитни хайырланнганды.

Россельхозбанкны бёлюмюню къырал прогрммагъа кёре быйыл 350 миллион сом кредит берирча келишим къураргъа мураты барды. Бюгюнлюкде заявка бергенлени ёлчеми жалан 70 миллион сомгъа жетеди. Эсге сала айтсакъ, республикада аграрийлеге сезон ишлеге берилген кредитлени 94 процентин РСХБ жалчытханды.

- Жылгъа беш процент тёлерча льготалы кредит битимчилик, эт, эм сют малчылыкъ бла кюрешгенлеге эм эл мюлк продукцияны жарашдыргъанлагъа бериледи. Банк берилген заявкалагъа къысха заманны ичинде къарайды, деп билдиреди гитче эм орта бизнесни клиентлери бла ишлеген бёлюмню таматасы Залим Алоков.