Ма аллай социал проектни чеклеринде Тырныауузну картодромунда картингден ачыкъ республикалы эришиуле бардырылгъандыла. Ала Афганистанда ёлген интернационалист аскерчиле Хаджиланы Юрийге бла Арсен Шамурзаевге жораланнгандыла. Ала  Афганистанны ветеранларыны союзуну эмда Элбрус районда аллай организацияны башламчылыкълары бла къуралгъандыла.

Турнирге Тырныауузну 5-чи номерли гимназиясыны «Картинг», Бахсан районну «Атажукино», Урван районну «Элбрус» эмда Шимал Осетияны «Владикавказ» сабий биригиулерини командалары къатышхандыла. Аланы араларында тырныауузчула айырмалы болгъандыла. Батал Шамурзаевни бла Алексей Бабенко юйретген жаш спортчула битеукомандалы эришиуледе биринчи жерге чыкъгъандыла.

Энчи зачётда уа  «Кадет» бёлюмде эришген Салпагарланы Адей хорлагъанды. «Миллет юниор» бёлюмде уа Гулийланы Керим барысын да озгъанды, Жаппуланы Къурман а ючюнчю жерге чыкъгъанды. «Пионер» бёлюмде уа алчылыкъны Буштокъланы Исмайыл бла Башийланы Къууанч биринчиликни кишиге ычхындырмагъандыла. Ючюнчю жерни уа барысындан да жаш болгъан Будайланы Мариям алгъанды. Ол «Эркин» бёлюмде эришгенди.

Хорлагъанла эмда алчы жерлеге чыкъгъанла кубокла, майдалла эмда грамотала бла саугъаланнгандыла. «Бек жаш спортчу», «Хорламгъа итиниулюгю»», «Эришиуге къатышхан къызчыкъ» деген атлагъа тийишли болгъанла да энчи саугъала бла белгиленнгендиле.

Саугъалаугъа сыйлы къонакъла да къатышхандыла – КъМР-де Адамны эркинликлери жаны бла уполномоченный Зумакъулланы Борис, Халкъла аралы Черкес ассоциацияны таматасы Хаути Сохроков, КъМР-ни Парламентине Жамауат советни башчысы Бечелланы Илияс, «Афганистанны ветеранларыны союзу» битеуроссей жамауат организацияны КъМР-де бёлюмюню таматасы Тимур Тхагалегов, Элбрус районну администрациясыны башчысыны къуллугъун толтургъан Сотталаны Къурман.  

Анатолий ТАЛАЕВ.