Кюз артында алма, кертме, жюзюм, эрик эм тахта кёгетле да аламат тирлик бергендиле. Аланы арасында бютюнда тамашасы уа отуз жыл мындан алгъа кеси аллына чыкъгъан наныкъды. Ол илипинни къатында ёседи. Бирси кёгетлеча болмай, жыл сайын августдан башлап ноябрьни ахырына дери бирча бай тирлик бергенлей турады. Анга къурт-къумурсха эм ауруу да къатылмайды. Кеси да къылыкъсыз битим тюйюлдю.
Таулада ёсген кёгетле бла наныкъла – чыгъана къасмакъ, ит бурун, тукъузгю, муркку, чертлеуюк, ишхелди, тюртю, мароко, наныкъ, алма, кертме не заманда да кёп битедиле, тазадыла эм татыулудула. Адамла аланы жыйып хайырланадыла.
Къыркъар чомартды дейдиле. Ол битеу берекетими кёрюгюз, къууаныгъыз, сейирсинигиз дегенча, бизни аллыбызгъа тёгюп къояды. Агъачха кирсенг, аны тамашалыгъын кёресе – жашил, сары, къызыл жомакъ тюрсюнлю. Тукъузгюню жемишлери кюнде багъалы мынчакълача жылтырайдыла. Агъач кертмени уа тёгерегин къара наныкъ алгъанды. Ишхелди ёсген тала чыкъда накъут-налмас себилгеннге ушайды. Тюртю уа узакъда жаннган от кибикди, къасмакъ бла къайын а бир бирлерин толтурадыла.
Тёгерекде ёсген гокка хансладан эм бишген кёгетледен ариу ийис урады, тереклени шууулдагъаны, тау черекни шорхулдагъаны ариу макъамлы эшитиледи. Аланы бары да энчи суратны кёргюзтедиле. Бу сейирликге къарап, тынгылап, кетеригинг келмей, иги кесек заман кечинесе.
Беккиланы Омар.
