Къэбэрдей-Балъкъэрыр къулейщ узэрыгушхуэ хъун уэрэджыIакIуэхэмрэ артист ныбжьыщIэхэмкIэ. Урысейм, нэгъуэщI щIыпIэхэм щекIуэкI гъуазджэ, щэнхабзэ зэхыхьэхэм ахэращ ди щIыналъэм щытхъу ин къыхуэзыхьыр. ЦIыхубэм фIыуэ ялъэгъуа, республикэр зэрыгушхуэ артистхэм ящыщщ Абэнокъуэ Рустам.
Борыкъуей къуажэм и курыт еджапIэм и еханэ классым щIэсу уэрэд жыIэным щыдихьэхым, Абэнокъуэм я жылэм ЩэнхабзэмкIэ и унэм къыщызэрагъэпэщ зэхыхьэхэм уэрэд щыжиIэн щIидзащ. Ебгъуанэ классым щыкIуэм ар хыхьащ «Терчанка» цIыхубэ ансамблым. 2004 гъэм ГъуазджэхэмкIэ Кавказ Ищхъэрэ институтыр къиухри, и щIэныгъэм щыпищащ Собинов Леонид и цIэр зэрихьэу Саратов щыIэ къэрал консерваторэм. Рустам лэжьэн щыщIидзар ди республикэм и Музыкэ театрырщ. ИужькIэ абы и зэфIэкI щигъэлъэгъуащ Саратов къалэм дэт оперэмрэ балетымкIэ академие театрым, Москва Лъэпкъ гъуазджэхэмкIэ и Къэрал музыкэ театрым, уэрэдымрэ къафэмкIэ Урысеидзэ академие ансамблым. 20I0 гъэм щыщIэдзауэ ар Налшык и Музыкэ театрым и солистщ.
ЦIыхухэм ягу дыхьэу Абэнокъуэм егъэзащIэ оперэхэм щыщ ариехэр, романсхэр, эстрадэ уэрэдхэр. Апхуэдэу Рустам сурэт техыным дехьэх, республикэм щекIуэкI концертхэр екIуу къызэрегъэпэщ икIи ахэр гукъинэу ирегъэкIуэкI.
Музыкэ театрым и унафэщIхэм жаIэ Москва зи щIэныгъэм щыхэзыгъахъуэу республикэм и щэнхабзэмрэ гъуазджэмрэ хэлъхьэныгъэ хуэзыщIыну къэкIуэжа щIалэр жэуаплыныгъэ ин пылъу гурэ псэкIэ къыхиха и лэжьыгъэм зэрыпэрытыр.
ТЕКIУЖЬ Заретэ.
