Республиканы талай районларында тозурагъан юйледен кёчюрюллюклеге деп жангы журтланы къурулушу барады. Бу ишни КъМР-ни Правительствосу энчи контрольда тутады. Бу кюнледе аны Председатели Мусукланы Алий иш не халда болгъанына  къарагъанды.
Биринчиден, ол Майскийде болгъанды, районну эмда шахарны администрацияларыны, подряд организацияны башчылары бла тюбешгенди. Объектге къарагъандан сора, къурулуш тынгылы бардырыла тургъанын, ишни качествосун да белгилегенди. Аны бла бирге аланы терклендирирге чакъыргъанды.
Шёндю къурулушчула биринчи юйде жер тебиуге къажау жумушланы тамамлай турадыла, аны тыш къабыргъаларын къалап башларгъа хазырланадыла. Экинчи юйню уа экинчи къатысы битгенди. Объектледе талай бригада къармашханы себепли иш тири барады. Юйле битгенлери бла жангы фатарлагъа Майский шахарда жашагъан 88 юйюр кёчюрюллюкдю.
Мусукланы Алий Терк районда аллай журтла къалай ишлене тургъанларына да кёз жетдиргенди. Тийишли программаны хайырындан алагъа 87 адам кёчерикди. Бериллик фатарланы ёлчеми битеу да 1374 квадрат метр болады. 
Дейское элде аллай юйлени къабыргъалары къаланнгандыла, башлары да жабылгъанды. Эшиклери, терезелери салыннгандыла, суу, газ, канализация ызла да тартылгъандыла. Шёндю отоуларында сюртюу-бояу ишлени бошай турадыла, ызы бла газ эмда электрокюч системаланы жарашдырлыкъдыла.
Терекде юйде да иш къазауатды. Къурулушчула аны экинчи этажын битдиргендиле, ючюнчюсюн къалап башларгъа хазырланадыла. Правительствону Председатели анда да тийишли буйрукъла берип кетгенди.
Улбашланы Мурат 
хазырлагъанды.