КъМР-ни Эл мюлк министерствосундан билдиргенлерича, быйылгъы жыл башланнганлы   «Агропромышленный комплексни продукциясыны экспорту» регион эм  «Халкъла аралы  кооперация эм экспорт»  миллет проектлеге  кёре  республиканы эл мюлк чыгъарыучулары  жауун халда суу сугъаргъан  41 машина алгъандыла. Аны себеплиги бла  4,1 минг гектар чакълы жерде мелиорацияны  хайырланырча болгъанды. 

Республиканы эл мюлк министри Хасан Сижажев айтханыча, быйылны ахырына  миллет проектни чеклеринде сугъарылгъан жерлени   4,72 минг гектаргъа жетдирир мурат барды. Бюгюнлюкде  план 87 процентге толтурулгъанды. Болсада аны белгиленнген жюз процентге жетдирирча, мюлкледе  мелиоратив системаланы жарашдырыу тири бардырылады.  

Быйыл, башында сагъынылгъан проектлеге кёре, республикада  мелиорацияны айнытырча  356 миллион сомгъа жууукъ  бёлюнюрюкдю.  Шёндю андан  294  миллион сом субсидия халда иеликлеге  тапдырылгъанды.  Ахчаны иги кесеги неда 291 миллион сом федерал бюджетден берилгенди, республика да кесинден 3 миллион сом къошханды.  

КУРДАНЛАНЫ Сулейман.