Бизни республикада А-158 трассаны Алтуд элни ичинде бешкилометрлик кесегине белгиленнген болжалындан алгъа тынгылы ремонт этилгенди. Жоллагъа къарагъан «Кавказ» Управленияда айтханларыча, подряд организацияны ишчилери эски асфальтны къырып кетергендиле, ызы бла эки къатлы жангы асфальт жайгъандыла. Аны тюбюн а аула салып кючлендиргендиле. Орамланы мюйюшлерин да ол халда жарашдыргъандыла. Жауун суула чырмаусуз кетерча, жолну тюбюнде орнатылгъан эки быргъыны да жангыртхандыла.

Машиналада баргъанланы эмда жаяу жюрюгенлени къоркъуусузлукъларын жалчытырча жолну бир кесегинде эски темир бурууланы жангыларына алышындыргъандыла. Дагъыда белгиле орнатхандыла, асфальтда да аланы термопластик бла бояп жарашдыргъандыла. Орта школну къатында уа автотранспорт келе тургъанын таууш этип билдирген ызла ишлегендиле.

Бу ишлени чеклеринде маршрут транспортха да эс бурулгъанды: элни ичинде автобусла тохтаучу алты павильон жангыртылгъанды. Эсге сала айтсакъ, былтыр бу элде тёрт километр чакълы жоллада чыракъла орнатылгъан эдиле.

Улбашланы Мурат.