ШИМАЛ КАВКАЗДА ТАУ ТУРИЗМНИ КЪОРКЪУУСУЗЛУКЪ АМАЛЛАРЫНА КЪАРАЛГЪАНДЫ

Шимал-Кавказ федерал округда Россей Федерацияны Президентини толу эркинликли келечиси Юрий Чайка председательлик этген кенгешге Къабарты-Малкъар Республиканы Башчысы Казбек Коков видеоконференция амал бла къатышханды. Анда Шимал Кавказда тау туризмни къоркъуусузлукъ жаны бла игилендириу соруула сюзюлгендиле. 

Тюнене Казбек Коков ишге тёрели халда чыкъгъанды. Тёрт кере этилген ПЦР-тинтиу регионну Башчысында коронавирус болмагъанын кёргюзтгенди. Июньда республиканы таматасы коронавирус жукъгъан ауруугъа къажау дарманны салдыртыуну толу курсун ётгенди. 

Кенгешге Россей Федерацияны граждан оборона, къыйын болумла эм табийгъат къыйынлыкъланы кетериу жаны бла министрини къуллугъун болжал халда толтургъан Александр Чуприян, Туризмни федерал агентствосуну таматасы Зарина Догузова, Шимал-Кавказ федерал округну субъектлерини таматалары, «Туризмни къоркъуусузлугъу» турист индустрия объектлени  къоркъуусузлукълары жаны бла ассоциацияны, Тау гидлени ассоциацияларыны  эм сейирлери болгъан башха министерстволаны бла ведомстволаны келечилери да къошулгъандыла. 

Кенгешни ишин ача, Юрий Чайка туризм Шимал Кавказ регионлагъа бек магъаналы ыз эм макрорегионну экономикасын айнытыугъа энчи болгъанын чертгенди. Ол болумлада къоркъуусузлукъну жалчытыу соруула туризмни къурауда эм магъаналыладан бирлеридиле. 

Айтылгъаныча, туристлени къоркъуусузлукъларын тамамлауда кемчиликлеге тау туризмни къоркъуусузлугъун жалчытыу жаны бла норматив праволу регулированияны бирикдирилген низамы, гидлени хазырлау программаланы, аланы сертификация этиу, Россейни МЧС-ини бёлюмлерини контроль бардырырча тийишли эркинликлери болмагъанларын санарчады.  
«Россейни МЧС-ини Элбрус бийик-тау излеу-къутхарыу отрядыны къутхарыучуларыны бийик профессионаллыкъларын, батырлыкъларын эм ётгюрлюклерин белгилерге тийишлиди. Ала кюнню къыйын болумларына, ишлени кече бардырыргъа тюшгенине да къарамагъанлай, жууаплы жумушну толтургъандыла – битеу таугъа кётюрюлгенлени тапхандыла эм маршрутдан тюшюргендиле, ол санда, жарсыугъа, ёлгенлени да», - дегенди Юрий Чайка, жыйылгъанланы эслерин ол шартха энчи буруп.

Россейни МЧС-ине предложенияланы айтып, Россей Федерацияны граждан оборона, къыйын болумла эм табийгъат къыйынлыкъланы кетериу жаны бла министрини къуллугъун болжал халда толтургъан Александр Чуприян сёлешгенди.  Тау туризмни регулирование этиу жаны бла шёндюгю болумну эм законла чыгъарыу башламчылыкъланы юсюнден Туризмни федерал агентствосуну таматасы Зарина Догузова айтханды.

Къабарты-Малкъар Республиканы Башчысы Казбек Коков эм Къарачай-Черкес Республиканы Башчысы Темрезланы Рашид къырал власть органланы СКФО-ну объектлеринде тау туризмни айнытыу жаны бла бардыргъан ишлерини юсюнден хапарлагъандыла.

Кенгешни эсеплерине кёре амалланы жыйымдыгъы эм протокол буйрукъла къуралгъандыла, аланы тамамланыулары СКФО-да РФ-ни Президентини толу эркинликли келечисини аппаратыны къарауунда боллукъду.

Бизни корр.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.