Кёп болмай Нальчикни мэриясыны кёп фатарлы юйлени арбазларында сабийле ойнарча майданла ишлеу проекти конкурсда юч эм иги ишледен бирине саналгъанды. Анга саулай къыралдан 950 чакълы шахар къатышханды.
Проектни эки тюрлю социал магъанасы барды - сабийле заманларын зауукълу ётдюрюрча качестволу ойнаучу жерле къураргъа эм кёп фатарлы юйлени арбазларын игилендириуге жамауатны эсин бурургъа.
Алай бла муниципал программагъа кёре, юйлени арбазларында сабийлеге жангы излемлеге келишген майданла ишлерге аламат онг тапдырылады. Аны ючюн подъездледе жашагъанла ахчаны жаланда жартысын бередиле, къалгъанын а мунципалитет кеси бюджетинден къошады. Сёз ючюн, Нальчикде къоз терек бахчада видеокамералары, Интернети, чыракълары эм башха затлары бла омакъ сабий майдан аллай программаны чеклеринде ишленнген объектледен бириди.
Конкурсда хорлагъаны ючюн Нальчикни администрациясында Шахарны, курорт эм туризмни айнытыу жаны бла департаментини таматасы Алимбек Апековха Сыйлы дипломну РФ-ни Президентини Администрациясында ич политика жаны бла управлениясыны таматасыны орунбасары Владимир Мазур бергенди.
Магометланы Сулейман.