Россельхозараны Къабарты-Малкъарда бёлюмюню лабораториясында битимчилик продукцияны качествосун тинтиу бла тынгылы кюрешедиле. Учрежденияда айтханларына кёре, эл мюлкде жангы амалла кийириле баргъаны себепли арт жыллада тирлик игиден иги бола барады, аны себепли лабораторияны иши да кёпдю. Алай дагъыда бай тирлик мирзеуню качествосу иги болгъанын хар заманла да кёргюзтмейди. Мында специалистле уа аны жик жиги бла тинтип, къаллай продукция ёсдюрюлгенини, ол неге жарарыгъыны, аны къоркъуусузлугъуну юсюнден толу хапар айтырыкъдыла. Аны барын да билирча лабораторияда битеу керекли оборудование барды, дейдиле.
Бу кюнледе да мында иш къазауатды. Республиканы сабанларында тирлик жыйыу къыстау баргъаны себепли лабораторияны специалистлерини да бош турур заманлары жокъду.