Россельхознадзорну Шимал-Кавказда регионла аралы управлениясыны специалистлери бизни республикада теплицалары болгъан мюлкледе фитосанитария болумгъа контроль этгенлей турадыла. Ведомствода айтханларыча, бу иш карантиннге тийишли заранлы къурт-къумурсхала жайылып башланнганларын заманында ачыкълар хыйсап бла бардырылады.
Ол умутда специалистле теплицаны ичинде энчи къапханла саладыла. Алагъа уа бадыражанланы, гюллени, башха тюрлю битимлени ёсюмлерин тыйгъан къурт-къумурсхала жабышып тутуладыла. Бу иш заманында этилмесе, ала тышына ычхынып, башха мюлклеге жетериклерине сёз да жокъду. Ол а уллу къоранчлагъа келтирлиги баямды.
Алайды да, быйыл июньда мюлкледен биринде аллай къапханла орнатылгъандыла. Заманы чыкъгъандан сора аланы Россельхознадзорну лабораториясында тинтгендиле. Анда уа ол теплицада заранлы зат болмагъанын белгилегендиле. «Абери табылса уа, анда карантин кийирирге тюшерик эди», деп чертгендиле Управленияда.