Кёп болмай Чегем муниципал районну администрациясыны башчысы Юра Борсов ара стационарны тынгылы ремонт этиле тургъан поликлиника эм сабийлеге бакъгъан бёлюмлеринде болгъанды.   
Алада инженер коммуникацияла тартыладыла, эшикле, терезеле, пол да   алышындырыладыла,  процедура  кабинетле  жангыртыладыла эм сюртюу-бояу жумушла тамамланыладыла.   
Кёп болмай подряд организацияны ишчилери учрежденияны ючюнчю къатысын бошап, экинчисине кёчгендиле.
Юра Карабиевич, кёргенине бюсюресе да, къурулуш ишлени тынгылы этерге,  качестволу  материалланы  хайырланыргъа  эм графикден кеч къалмазгъа кереклисин эсгертгенди. Ол алгъаракълада  жауун, жел да кёзлеге бакъгъан бёлюмге салгъан хатаны  къысха заманда кетергенлери, саусузланы жунчутмагъанлары ючюн да ыспас этгенди.   
Бу кюнледе  Юра Борсов Хушто-Сыртда бла Лячинкъаяда да болгъанды эм «Таза суу» федерал проект къалай толтурулгъанын тинтгенди. Бюгюнлюкде аны чеклеринде сагъынылгъан элледе 12 километр чакълы эски суу быргъыланы алышхандыла. Жууукъ заманда мында арбазланы жангы ызлагъа къошуп, жолланы тап халгъа келтирип башларыкъдыла.  
 Каменканы жангы микрорайонунда да элни  бюджетине  жангы скважина сюелтилиннгенди. Экинчи Чегемде да быллай объект Ленин, Алакаев, Казаноков, Ногмов эм Элбрус  орамланы таза суу бла жалчытырыкъды. Аны хайыры бла арбазлагъа къошакъ халда бир сагъатха 25 кубометр суу берилликди.
Эсге сала айтсакъ, былтыр проектге кёре  районну эм эллени бюджетлерине эм башха ахчалагъа да Чегем районда 8 водозабор къуралгъанды.