Нальчикде Россей Федерацияны Президентини Шимал-Кавказ федерал округда толу эркинликли келечиси Юрий Чайканы бла Къабарты-Малкъарны Башчысы Казбек Коковну ишчи тюбешиулери болгъанды. Аны кезиуюнде республиканы социал-экономика эмда жамауат-политика айныууну онглары сюзюлгендиле. Ол санда СКФО-ну социал сферасын бла экономикасын айнытыу жаны бла правительстволу комиссияны РФ-ни Правительствосуну Председатели Михаил Мишустинни башчылыгъында быйыл 15 июньда бардырылгъан кенгешинде этилген оноула къалай толтурулгъанларына да къаралгъанды.
Къабарты-Малкъарда санитар-эпидемиология болумгъа, ол осалгъа кетмез ючюн не мадарла этилгенлерине да энчи эс бурулгъанды. Юрий Чайка республикада жашагъанлагъа вакцинацияны магъаналылыгъын ангылатыу жаны бла ишни кючлендирирге деп аллай борч салгъанды.  Къабарты-Малкъарда туризмни айнытыргъа, бери солургъа адамла келирча этерге кереклисин чертгенди.
КъМР-ни Башчысы Полпредге Къабарты-Малкъаргъа сёзю, иши бла да себеплик этгени ючюн ыразылыгъын билдиргенди. «Шимал-Кавказ регионну айнытыуну стратегиясы сизни болушлугъугъуз бла жарашдырылгъанды. Аны Къабарты-Малкъаргъа да хайырын биз кёребиз. Анда белгиленнген проектле производствобузну, халкъгъа этилген жумушланы санын иги да кёбейтирге, туризмни айнытыргъа да онг берликдиле.
Республикада туризмни айнытыргъа уллу онгла бардыла, Сёз ючюн, Нальчик курортха энчи иели инвестицияладан 10 миллиард сом чакълы бир къоратыргъа умут этебиз. Ол а бизге ич регион продуктубузну ёлчемин 10 миллиард сомгъа ёсдюрюрге онг берликди. Бизге ол бек магъаналыды»,-дегенди Казбек Коков.
Ол бюгюнлюкде халкъгъа жумушланы тындырыуда ёсюм болгъанын, республикалы бюджетге тюшген файдалагъа да биринчи жарым жылда 20 процент къошулгъанын билдиргенди. Казбек Коков: «Туризмни мындан ары да тири айнытып барыргъа мурат этебиз»,- дегенде, Юрий Чайка: «Ол толлугъуна ийнанама»,-деп къошханды.