Налшык къалэ дэт Лъэпкъ музейм сурэтыщI ныбжьыщIэхэм я гъэлъэгъуэныгъэ гъэщIэгъуэн икIи щIэщыгъуэ къыщызэIуахащ. Нэр ягъэгуфIэ, псэр дахьэх музейм и блынхэм фIэдза сурэт щхъуэкIэплъыкIэхэм.
ЦIыхур гъащIэм зыщрихьэлIэ дахагъэхэм ящыщ зы яIэщIэмыкIами ярейщ. Къалэ уэрамхэм «зыщаплъыхьащ», щIыуэпсым и дэтхэнэ плIанэпэми «къуэплъащ», къэкIыгъэхэм я дахагъэри, псэущхьэхэм я теплъэ гъэщIэгъуэнри ди деж нэIурыт дыдэу къахьэсащ.
Гъуазджэм дихьэххэу, абы хуеджахэу Хъаний Маринэ («Аслъэн», «ПщIыхьэпIэ», «Гъэмахуэ», н.), Куэт Иринэ («Кавказ. Дыгъэ къыкъуэкIыгъуэу», «Шэджэм псыкъелъэхэр», н.), Къэнэмэт Лейлэ («Дыгъэ къухьэгъуэм», «Iуащхьэмахуэ», «Жэщ уафэ», н.), Дзэгъащтэ Беллэ («Дыгъэпс махуэр жыг хадэм», н.) сымэ я IэдакъэщIэкIхэр утыку кърахьэнымкIэ щIэгъэкъуэн хъуар «Blammo» IуэхущIапIэращ. Махуэшхуэхэр, еджапIэр къэзыуххэм я пшыхьхэр, псапэ зыпылъ Iуэхухэр къызэзыгъэпэщ IэнатIэм зэхиша мы зэIущIэмкIэ я мурадщ сурэтыщIхэм я IэдакъэщIэкIхэр цIыхухэм яригъэлъагъуну, аукционкIэ ящэу лэжьыгъэхэм къыщIэкIа ахъшэр «Blammo»-м къызэригъэпэщ «Голос. дети» телевизионнэ проектым трагъэкIуэдэну мылъкум халъхьэну.
Гъэлъэгъуэныгъэр къыщызэIуах зэIущIэм къыщыпсэлъащ КъБР-м щэнхабзэмкIэ и министрым и къуэдзэ Карчаевэ Аминэ, КъБР-м и СурэтыщIхэм я зэгухьэныгъэм и правленэм и унафэщI Темыркъан Геннадий, Лъэпкъ музейм и унафэщI Накуэ Феликс, Урысейм, Къэбэрдей-Балъкъэрым я СурэтыщIхэм я зэгухьэныгъэм хэт Дзэгъэл Iэуес сымэ. Абыхэм псоми зыжьэу жаIащ щIалэгъуалэм гъуэгу етын зэрыхуейр, нэхъыжьхэм ейм къыщхьэщыкIыу абыхэм нэгъуэщI Iуэху бгъэдыхьэкIэ гъэщIэгъуэнхэр зэраIэр, дэтхэнэми и гуащIэм гулъытэ къызэрилэжьыр, утыкушхуэ зэрихьэфын зэчий зэрабгъэдэлъыр.
Зи лэжьыгъэхэр утыку къизыхьа сурэтыщIхэмрэ музейм и хьэщIэхэмрэ я гукъыдэжыр къаIэтащ КъБКъУ-м къафэмкIэ и «Каллисто» театрымрэ (унафэщIыр Романихинхэ Романрэ Иринэрэщ) Нэгъуд Борис и цIэр зезыхьэ центрым и «Къэбэрдей» къэфакIуэ ансамблымрэ (унафэщIыр Нэгъуд Романщ) хэтхэм. Абыхэм ягъэзэщIа къафэхэм дихьэхыу еплъа иужь, сурэтыщIхэр утыкум кърашэри, къызэхуэсахэм ирагъэцIыхуащ. Дэри ди щIэджыкIакIуэхэр абыхэм я гъащIэ гъуэгуанэм кIэщIу фридгъэплъэнщ.
Хъаний Маринэ 1977 гъэм Налшык къалэ къыщалъхуащ. Сурэт щIыным езыр-езыру зыхуигъэсэжащ, къалэм и теплъэр къэгъэлъэгъуэным, графикэм, хьэкIэкхъуэкIэхэм я сурэт щIыным дехьэх. 2008 гъэм къыщыщIэдзауэ сурэтыщIхэм я «Тушино» зэгухьэныгъэм (Москва) хэтщ. Иджыпсту Дзэгъэл Iэуес живописымкIэ и студием зыщегъасэ. «Си гъэсакIуэм и фIыгъэкIэ си IэдакъэщIэкIхэр къалъытэ хъуащ, сыдэзыхьэхыу щыта IэщIагъэр иджы си Iуэху нэхъыщхьэщ», - жеIэ Маринэ.
Куэт Иринэ 1998 гъэм Налшык къалэ къыщалъхуащ. Щытхэр реализм жыпхъэрщ, къигъэлъэгъуэну нэхъ фIэфIыр щIыуэпсым и дахагъэхэрщ. 2007 - 2014 гъэхэм ар щеджащ ГъуазджэхэмкIэ сабий школ №1-м. 2014 - 2018 гъэхэм Щэнхабзэмрэ гъуазджэхэмкIэ колледжым и «Дизайн» къудамэм щеджащ, диплом плъыжькIэ ар къиухащ. Иджыпсту Иринэ щIэсщ Кубань къэрал университетым (Краснодар къалэ) и художественно-графикэ факультетым. 2018 - 2019 гъэ еджэгъуэхэм ар Налшык къалэ дэт курыт еджапIэ №6-м щылэжьащ. Иринэ и хъуэпсапIэщ езым и студие Налшык къыщызэIуихыну, сабийхэр игъэсэну.
Къэнэмэт Лейлэ 1970 гъэм къалъхуащ. Къэрэшей-Шэрджэс Республикэм и къэрал педагогикэ университетым и художественно-графикэ факультетыр къиухащ. КъБР-м и Музыкэ театрым сурэтыщI декоратору щолажьэ. И щхьэ закъуэ гъэлъэгъуэныгъэу плIы иIащ, абыхэм ящыщу зыр Тыркум и Истамбыл къалэм. Зэман дызыхуэкIуэм и мурадщ гъуазджэхэмкIэ сабий студие къызэIуихыну.
Дзэгъащтэ Беллэ 1989 гъэм Тэрч къалэм къыщалъхуащ. Зэрысабий лъандэрэ сурэт щIыныр зыхилъхьэ щыIэкъым. Апхуэдэу щытми, школыр къиуха иужькIэ ар щIэтIысхьащ КъБКъУ-м и экономикэ факультетым. IэщIагъэ зригъэгъуэтам фIыуэ хэзагъэу ирилэжьащ, арщхьэкIэ и псэр зыхуеIэр аратэкъым. СурэтыщI Iэмэпсымэхэр 2020 гъэм и фокIадэ мазэм къищтащ икIи къыгурыIуащ ищIэну зыхуейр къызэригъуэтар. ЩIыуэпсым кърит гурыщIэхэр тхылъымпIэм е чэтэным зэрынихьэсым щогуфIыкI. Иджыпсту Ахъмэт Лиуан и деж гъуазджэм и щэхухэм зыщыхуегъасэ, сурэтыщIу ущытыныр насыпышхуэуи къелъытэ.
Псалъэ щратым сурэтыщIхэм фIыщIэ хуащIащ къызэхуэса псоми, я къару емыблэжу лэжьэнымкIэ я гуащIэр абыхэм къазэрыщыхъум куэд дыдэ зэрелъытари къыхагъэщащ.
P.S. Гъэлъэгъуэныгъэр бадзэуэгъуэм и 17 пщIондэ щыIэнущ, лэжьыгъэхэр щащэну аукционыр бадзэуэгъуэм и 13-м сыхьэт 15-м щIидзэу екIуэкIынущ.