КъМР-ни Башчысы Казбек Коков алгъыннгы республикалы полиграфкомбинатны мекямын кёре баргъанды. Жууукъ заманлада аны орунуна алайда  шёндюгю заманнга келишген къонакъ юй сюелликди. Республиканы оноучусу инвестиция компанияны келечилери эмда Нальчик шахар округну администрациясыны башчысы Таймураз Ахохов бла тюбешгенди эмда проект бла байламлы ишле къалай баргъанларын сюзгенди.
Он минг  квадрат метр чакълы бир жерде къураллыкъ къонакъ юйню 58 отоуу, коворкинги, ишчи арасы, рестораны бла кафеси боллукъдула. Мекямны тёгерегиндеги терекле да сакъланырыкъдыла. Инвестицияланы ёлчеми уа  400 миллион сомгъа жетерикди. Къурулуш ишле башланнгандыла, аланы 2023 жылда бошаргъа белгиленеди.
-Жангы къонакъ юйню проектине инвесторланы жууаплы кёзден къарагъанлары, ара шахарыбызгъа бла анда жашагъанлагъа игилик этерге итиннгенлери  къууандырады. Проектни социал магъанасы барды. Мекямны тарых ышанлары сакъланадыла. Жангы кёрюмдюсю бла уа ол проспектни архитектура болумуна бек тап келиширикди, аны бла бирге шёндюгю европалы ызны бла миллет ышанланы бирикдирликди.  Миллет оюула аны корпусларындан бирини ал бетин жасарыкъдыла, кенг отоуларында уа художниклерибиз чыгъармаларыны кёрмючлерин къураргъа боллукъдула,- дегенди Казбек Коков тюбешиуден сора.
Ол бу  инвестиция проектни толтуруу Нальчик курортну эмда Къабарты-Малкъарда туризмни саулай да айнытыу жаны бла планлагъа киргенин да чертгенди. «Туризмни бла къонакъбайлыкъны игилендириуге, халкъны жумушларын жалчытыугъа, ишчи жерле къураугъа, республикабызны кёрюмдюсюн айбатландырыугъа себеплик этерик инвесторла не къадар кёп болурча онгла къураргъа керекбиз. Жангы къонакъ юй Нальчикни атын айтдырлыгъына, республиканы къонакълары анга сюйюп келликлерине ишексизме»,- деп чертгенди регионну оноучусу.