Тюнене Казбек Коков кезиулю «муниципал  сагъатны» бардыргъанды. Аны ишине КъМР-ни Правительствосуну Председатели Мусукланы Алий, аны биринчи орунбасары Муаед Кунижев, КъМР-ни саулукъ сакълау министри Рустам Калибатов, районланы бла шахарланы администрацияларыны башчылары къатышхандыла.
Жыйылыуда республикада вакцинация къалай баргъанына, миллет проектлени, федерал эм регион программаланы толтуруу не халда болгъанына къаралгъанды, башха социал жумушланы юсюнден сёлешиннгенди.
-Эпидемиология болум игиленмейди, ауругъанлагъа къошула барады, реанимациялада жатханланы саны да ёседи. Аны бла байламлы Къабарты-Малкъарны жеринде 200 ундуругъу болгъан ючюнчю госпитальны ачаргъа оноу этгенбиз,- дегенди республиканы оноучусу. Ол  жыйылыулада, къууанчлада 50-ден кёп адам болмазгъа кереклисин энтта да бир кере эсгертгенди.   
Рустам Калибатов  республикада вакцинация этдиргенлени саны 80 мингден атлагъанын билдиргенди.  7 июльгъа Къабарты-Малкъарда COVID-19  жукъгъан адамланы саны битеу да  25 229-гъа жетгенди. Бир сутканы ичинде уа  51 адам ауругъанды. Бюгюнлюкде госпитальлада 461 саусуз, ол санда реанимациялада 60-сы, жатадыла.
Сёз миллет проектлеге бла федерал эмда регион программалагъа жетгенде, быллай шартла келтирилгендиле: бюгюннге алагъа бёлюннген ахчаны 44 процентинден асламы хайырланнганды, битеу да  350 келишим этилгенди. Белгиленнген проект ишле бла байламлы келишимлени толусунлай этип бошагъан муниципал къуралыула да туура этилгендиле. Ала быладыла: Прохладный бла Бахсан шахар округла, Лескен, Элбрус, Урван, Чегем, Бахсан эмда Черек районла.