Къабарты-Малкъарны Курортла эм туризм министерствосунда квадроциклледе «Наследие России. Вокруг Эльбруса» деген экспедициягъа къатышханла бла тюбешиу болгъанды, аны ведомствону башчысы Мурат Шогенцуков бардыргъанды.
Экспедиция 21-27 июньда ётгенди, аны Москваны «Квадроостров» клубу бла Орус география обществону «Альтаир» жаш тёлю клубу регион министерствону болушлугъу бла къурагъандыла. Жолоучулукъгъа къатышханла, министрге ыразылыкъларын билдире, мындан арысында да байламлыкъла жюрютюрге ышаннганларын айтхандыла. Экспедицияны башчысы Александр Зимин белгилегенича, «Наследие России» проектни бардырыргъа умут алагъа 2018 жылда Москвадан жыйымдыкъ къауум Баш Кавказ хребетни Къабарты-Малкъарда кесегинде болгъанында келген эди. Аны мураты краеведение халда внедорожникледе бла квадроциклледе жолоучулукъланы къурауду, аланы кезиулеринде къыралыбызны бай табийгъат, тарых-маданият хазнасы бла шагъырейлениудю.
- Быйылгъа биз жолгъа иги да сынам жыйып, ахшы техника бла жалчытылынып, бир бирибиз бла керти шуёхлукъ жюрюте чыкъгъанбыз. Сейирлик тарых, культура эсгертмелени кёргенбиз, экспедициябыз бийик даражада ётгенди. Бу проектибизни Къабарты-Малкъарда, Шимал Кавказны къоншу регионларында да бардырыр умутлубуз, - дегенди Александр Зимин.
Алай бла жолоучула регионда 600 километрни ётгендиле, Баш Кавказ эм Скалистый хребетлени араларында 6 ауузда бла 7 ауушда болгъандыла, кёп тамашалыкъ жерлерибизни кёргендиле, миллетлерибизни аш-азыкъларындан татхандыла, жашау-турмуш болумлары бла шагъырейленнгендиле. Ала лагерьлерин Черек, Чегем, Бахсан эм Малка ауузлада къурагъандыла, экспедицияны ахыр кюнюнде уа Минги тауну къыбыла жанындан башлап Эммануэльни таласыны, Къанжолну юсю бла ётюп, шимал этеклерине жетгендиле. Алагъа бу сейир маршрутну краевед Орус география обществону келечиси Мокъаланы Тенгиз къурагъанды.
