Парламентни Физкультура эм спорт жаны бла комитетини жыйылыуунда КъМР-де спорт школланы болумлары, аланы айнытыуну онглары сюзюлгендиле. Ол Нальчикде Сабий стадионда бардырылгъанды. Анга спикерни орунбасары Мурат Карданов, жууаплы министерстволаны, шахарны администрациясыны келечилери, спорт школланы башчылары да къатышхандыла.
Физкультура эм спорт жаны бла комитетни башчысы Арсен Барагунов, тюбешиуню ача, спорт школланы ёсюп келген тёлюню саулугъун кючлеуде, жетишимлени спортун айнытыуда магъаналары уллу болгъанын айтханды.
- Учрежденияланы баш борчлары жамауатда саулукълу жашауну жорукъларын жайыуду, жаш адамланы спортха кёллендириудю, аланы не жаны бла да айнытыуду: интеллектуал, адеп-намыс, кюч-къарыу жаны бла да. Шёндюгю кезиуде, гаджетле кенг жайылгъан заманда, ол артыкъда магъаналыды,-дегенди ол.
Республикада спорт школланы болумларыны, аланы айнытыуну онгларыны юслеринден спорт министрни орунбасары Аналаны Аслан доклад этгенди. Аны айтханына кёре, КъМР-де 47 спорт школ, жыйымдыкъ командаланы хазырлау жаны бла ара, «Спартак-Нальчик» футбол клуб да бардыла. Аладан 36-сы муниципал иеликдедиле. 16 организация олимпиадалы резерв даражалыдыла. Спорт федерацияланы 46 бёлюмю аккредитация алгъандыла. Аладан 16-сы спортну олимпиалы, бири уа сурдлимпий тюрлюлеринден.
Былтыр спортчуларыбыз 150 эришиуге къатышхандыла. Тюрлю-тюрлю турнирледе, чемпионатлада 173 адам хорлагъандыла, саугъалагъа тийишли болгъандыла.
Аналаны Аслан спорт школланы кадрла бла жалчытыуну, аланы техника-ырысхы базаларын игилендириуню, ахча бла жалчытыуну сорууларына энчи эс бургъанды. Ол билдиргенича, былтыр 33 тренерге квалификация берилгенди, ол санда бир судьягъа битеуроссей категория. «Россейни спортуну сыйлы устасы» деген атха бир адам, «Россейни спортуну халкъла аралы класслы устасы» деген ат да экеуленнге берилгенди. 29 инсан «Россейни спортуну устасы» болгъандыла.
Ахыр жыллада уа школланы ырысхы-техника базаларын игилендириу жаны бла мадарла толтурулгъандыла. Былтыр 33 спорт объект ишлетилгенди. Экиси алыкъа хайырланыргъа берилмегендиле (Бахсанда бла Псыхурейде ФОК-ла), башхалары уа ишлейдиле.
Быйыл а «Демография» миллет проектни «Спорт – жашауну жоругъу» регион проектини чеклеринде федерал бюджетден 359 миллион сом бериллиги белгиленеди. Ахча Нальчикде шёндюгю пятиборьеден жараула бардырырча спорт комплексни эмда аны тийресинде футбол майданны ишлетиуге къоратыллыкъды. Дагъыда Зольск районда Белокаменск элде физкультура-саулукъ сакълау ара да къураллыкъды.
- Ахыр юч жылны ичинде спорт организацияланы тийишли инвентарь бла жалчытыуда иги жанына тюрлениуле асламдыла,-дегенди Аналаны Аслан. – Ол санда тутушуу кюйюзле, рингле, боксда керекле келтирилгендиле.
Министерство командировкалагъа ахчаны кёбейтиу жаны бла мадарла да этеди. Багъала ёсгенлери, инфляция кёбейгени ючюн ахча жетишмей къалады. Сёз ючюн, быйылгъа салыннган ахчаны 95 проценти къоратылгъанды.
Тренерлени хакъларыны юсюнден да баргъанды сёз. Республиканы оноучулары аны билим бериу системада болгъан орталыкъ ёлчемге жетдирирге айтханларын да эсгертгенди докладчы. Бу жумушлагъа къаллай бир ахча керек болгъаны тергелгенди. Тийишли документле хазырдыла.
Спортну олимпиадалы болмагъан тюрлюлеринден спорт школну башчысы Заурбек Черкесов а бюгюнлюкде анда эки мингнге жууукъ адам, ол санда сабийле, таматала да, жарау этгенлерин билдиргенди. Учрежденияны бёлюмлеринде 48 тренер ишлейдиле. Жараула спортну 9 тюрлюсюнден бардырыладыла.
Докладда халкъла аралы эм россейли эришиуледе жетишимле кёргюзтген тренерлеге, спортчулагъа себеплик кереклиси белгиленнгенди. Быйыл дунияны, Европаны, Россейни чемпионатларында хорлагъанлагъа бир кере тёленнген ахчаны ёлчеми кёбейгенин да билдиргенди ол.
Жыйылыуда Нальчикни администрациясыны физкультура, спорт, жаш тёлюню ишлери жаны бла управлениясыны башчысыны орунбасары Ладин Апшев да сёлешгенди.
Тюбешиуде тренерлени бла устазланы аттестацияларыны, муниципалитетледе саулукъларына кёре чекленнген онглары болгъанланы спорт бла кюреширге кёллендириуню, Нальчикде Александровка микрорайонда ФОК ишлетиуню юслеринден да айтылгъанды.
Жыйылыуда этилген предложенияланы эсге алыу бла эсгертиуле къабыл кёрюллюкдюле.
