КъМР-ни Башчысы Казбек Коков бу кюнледе бардыргъан «муниципал сагъатда» вакцинация къалай бардырылгъанына энчи эс бурулгъанды. Жыйылыугъа КъМР-ни Правительствосуну председателини орунбасары Муаед Кунижев, КъМР-ни Башчысыны Администрациясыны таматасы Мухамед Кодзоков, республиканы саулукъ сакълау министри Рустам Калибатов, урунуу эмда социал къоруулау министри Асанланы Алим къатышхандыла.
Муниципал къуралыуланы жер-жерли администрацияларыны башчылары бла тюбешиуде айтылгъаныча, арт кюнледе вакцинация бла байламлы иш иги да тирилгенди, дарман салдыргъанланы саны аслам бола барады, бир суткагъа республикада орта эсеп бла 2,5 мингнге жууукъ адам вакцинация этдиреди.
Сёз халкъны иш бла жалчытыу не халда болгъаныны юсюнден да баргъанды. Асанланы Алим билдиргеннге кёре, 15 июньнга 26560 адам ишсизлеча эсепге алыннгандыла, тийишли пособияны 5833 адам алады. «РФ-ни Президенти 2021 жылда ишлегенлени санын субъектледе 2019 жылны ёлчемине жетдирирге деп аллай борч салгъанды. Къабарты-Малкъарда аны толтурур мурат бла талай жумуш этерге белгиленеди»,-дегенди министр.
Республиканы Башчысы ол ишни андан ары селейтмей бардырыргъа буюргъанды. Иш бериучюле бек алгъа социал борчларын толтурурларына энчи эс бурургъа кереклисин чертгенди.
«Муниципал сагъатда» миллет проектле районлада бла шахарлада къалай толтурулгъанларына да къаралгъанды. Казбек Коков «Единая Россияны» кёп болмай бардырылгъан съездинде Россейни Президенти Путинни эл мектеплеге тынгылы ремонт этиуню программасы къуралгъаныны юсюнден айтханын эсге салгъанды эмда районлада жангыртыргъа керек болгъан билим бериу учрежденияланы айырыргъа эмда аланы программагъа къошууну мадарларын этерге буюргъанды.