КъМР-ни Башчысы Казбек Коков Къабарты-Малкъар Республика къуралгъанлы 100-жыллыгъын белгилерге хазырланыу жаны бла къурау комитетни жыйылыуун бардыргъанды. Анда ол энди боллукъ байрам бла байламлы ишлени планыны юсюнден оюмун айтханды, эсгертиуле да этгенди. «Быйыл 1 сентябрьден башлап окъуна  битеу баш магъаналы ишле Къабарты-Малкъарны 100-жыллыгъыны белгиси бла ётерге керекдиле»,- дегенди.
Регионну оноучусу жууаплы къуллукъчулагъа бир ыйыкъны ичинде жарашдырылып тургъан планнга къошакъгъа шарт мадарла хазырларгъа эмда ишчи къауумланы тириликлерин кючлендирирге буюргъанды. Келир заманда белгилениллик къууанчлагъа комплекс халда хазырланыргъа кереклисин айырып айтханды.
-Тапландырыуну жангы даражагъа кётюрюу, социал магъаналы объектле ишлеу,  бизни кёп миллетли маданият байлыгъыбызны эсге алыу бла тынгылы программа жарашдырыу, хар адамыбыз жюреги бла сезерик белги къурау эмда къонакъбайлыкъ – ма ала бизни республиканы ёмюрлюк юбилейине жораланнган байрамны мурдорун тутаргъа керекдиле,-деп чертгенди Казбек Коков.