- Светлана, китапхананы быллай ариу халгъа келтириу къалай башланнганыны юсюнден айтсагъыз эди?
- Бюгюн биз бу аламат жерде олтургъаныбыз Нальчикни администрациясыны башчысы Таймураз Ахоховну, аны орунбасары Атмырзаланы Земфираны эм проектни этип, жашауда бардыргъан Владимир Шогеновну хайырларынданды. Шахарны Ара библиотека системасыны атындан ыразылыгъымы билдиреме. Окъуучуларыбыз да болмагъанча къууаныпдыла.
- Белгилисича, сизни филиал периодика бла кюреше эди, аны себепли китап фондугъуз артыкъ бай болмаз?
- Хау, тюзсе. Бюгюнлюкде жаланда 3,5 минг китап барды. Сора дагъыда саугъалы изданияланы сатып алыргъа бизге миллетибизни бек айтхылыкъ жашларындан бири Алтууланы Мурат онг тапдыргъанды. Аны болушлугъу бла ма бу сиз кёрген 300 сейир чыгъармала алыннгандыла. Сау болсун. Ары дери дагъыда 2014 жылны аллында да бир кере толтурулгъан эди фондубуз абадан эм сабий литература бла. Битеудуния адабиятдан кёп затыбыз барды. Уллуну-гитчени да сакълайбыз!
Шёндю асламында школла эм окъуу юйле бла ишлеп башлагъанбыз. «Жазгъы окъуула» бардырыладыла да школлада, устазла, сабийле да терк-терк келедиле. Ма бюгюн да олтуруп тургъанларын кёресиз. Филиалны ачылыуу 3 июньда болгъанды. Андан бери школчуланы араларында брейн-рингден эришиу да ётдюргенбиз. Дагъыда Интернет тартылгъан 4 компьютер да барды. Керек адам келип, алайда ишлеп кетерге боллукъду.
Сора былайда, эшикден киргенлей, санга закий Къайсыныбыз «тюбегени» жюреклени къууандырады. Бек уллу муратым а бизни филиалгъа аны аты аталсады да, бек ыразы этерик эдиле. Къулий улуну орамында аны аты бла китапхана ишлесе бек тийишлиди, деп оюм этеме.
Энтта да мында сабий отоуубуз да барды. Алыкъа ол ахырына дери не бла да жалчытылынып бошамагъанды, нек дегенде ахыр оюмгъа келишмегенбиз аны къалай жасаргъа деп. Саулайда бу объектге 4 миллиондан артыкъ ахча кетгенди.
- Изленнген китап сизде табылмаса уа?
- Бизде болмагъанны башха филиалладан тапдырабыз. Аны бла тыйгъыч болмайды.
- Китапхананы дизайны шёндюгю излемлеге кёре аламат жарашдырылгъанды. Аны юсюнден айтсагъыз эди.
- Аны автору Владимир Шогеновду. Ма къабыргъада тагъылгъан сагъатны окъуна ол китапладан жарашдыргъанды. Тапкаланы да чыракъ жарыгъы бла жасаргъа да аны эсине келгенди. Кесигиз ангылагъандан, быллай жерде ишлеригинг бютюн бек келеди.
- Ненча адам ишлейсиз мында?
- Мени бла бирге энтта экеулен бардыла. Тамата библиотекарь Таукенланы Жансурат эм абонемент бёлюмню ишин бардыргъан Газаланы Фатима борчларын тынгылы толтурадыла.
- Сау болугъуз.