Россейде Медицинада ишлегенлени кюнюню аллында КъМР-ни Парламентинде саулукъ сакълауда бет жарыкълы ишлеген, жетишимле болдургъан врачланы саугъалау болгъанды. Къууанчлы жыйылыуну спикер Татьяна Егорова бардыргъанды. Ол, белгиленнгенлени алгъышлай, медицина эм сыйлы, аны бла бирге уа жууаплы усталыкъ болгъанын чертгенди.
- Не заманда да анга халкъда уллу хурмет этилгенди. Адам улугъа медицинача артыкъда бек керек болгъан жукъ да жокъду дегенди бурун заманланы философларындан бири. Бу сёзле магъаналарын тас этмегендиле. Ол угъай, аланы кертиликлерине тюшюннгенбиз,-дегенди ол.
Татьяна Борисовна медикле адамны туугъан кезиуюнден башлап жашаууну узунлугъунда саулугъу ючюн жууаплылыкъны сезгенлерин чертгенди. «Ол тынч тюйюлдю. Алай сиз аны бет жарыкълы толтурасыз, берген антыгъызгъа кертичилей къаласыз. Аны уа ахыр кезиуде, сизге бютюнда къыйын ишни толтурургъа тюшген заманда,бютюнда сезгенбиз»,-дегенди ол.
Спикер медиклени коронавирус жукъгъан ауруугъа къажау ишде къыйынларын да белгилегенди. «Бу кезиуде пандемиягъа къажау кюрешни ал сатырларында болгъансыз. Кесигизни жашауугъузгъа, саулугъугъузгъа къоркъуу уллу болгъанына да къарамай, башхаланы сакълагъансыз, вирус андан ары жайылмазына къолдан келгенни этесиз. Сизни профессионал билимигиз, иш кёллюлюгюгюз жашауубуз керти да ышаннгылы адамланы къолларында болгъанына ийнандырады»,-дегенди спикер.
Ызы бла саугъалау башланнганды. Ол кюн медиклени уллу къауумуна Парламентни Сыйлы грамотасы берилгенди. Аланы ичинде ара район больницаланы баш врачлары, медицина бёлюмлени таматалары, участкалы терапевтле, анестезиолог-реаниматологла да бар эдиле.
Парламентни баш саугъасына тийишли болгъанланы арасында Бахсан шахарны бла Бахсан районну ара больницасыны терапия бёлюмюню башчысы Чепкенчиланы Жаннета, КъМР-ни Наркология диспансерини врачы- анестезиологу-реаниматологу Акъболатланы Расул да болгъандыла.
Республикалы багъыу-физкультура диспансерни бёлюмюню таматасы Керимланы Зухура бла 1-чи номерли шахар клиника больницаны врачы-кардиологу Ахкёбекланы Зухура да тийишли болгъандыла Парламентни Сыйлы грамотасына. Ала саулукъ сакълауну айнытыугъа салгъан къыйынлары ючюн белгиленнгендиле.
КъМР-ни Парламентини Председателини Ыспас къагъыты берилгенлени арасында уа Черек районну ара больницасыны медсестрасы Нёгерланы Нажабат да барды.
Саугъаланнганланы алгъышлай, Татьяна Борисовна алагъа жангы жетишимле, кеслерине, юйюрлерине да саулукъ, ырахматлы жашау тежегенди.
Къууанчлы жыйылыугъа спикерни орунбасары Мурат Карданов, Урунуу, социал политика эм саулукъ сакълау жаны бла комитетни башчысы Хусейн Кажаров, аны орунбасары Владимир Безгодько да къатышхандыла.
Ахырында медикле спикер эм депутатла бла суратха тюшгендиле.
