КъМР-ни Башчысы Казбек Коков республиканы Правительствосуну къаууму бла бу кюнледе бардыргъан жыйылыуда Пятигорскда СКФО-ну социал-экономика айныууна жораланып, Россейни премьер-министри Михаил Мишустинни башчылыгъында ётген кенгешни эсеплери сюзюлгендиле. Жыйылыугъа КъМР-ни Правительствосуну председатели Мусукланы Алий, аны биринчи орунбасары Муаед Кунижев, экономиканы айнытыу министри Рахайланы Борис, курортла эмда туризм министри Мурат Шогенцуков, жер эмда ырысхы бла байламлы халланы министри Аслан Тохов, КъМР-ни Айнытыуну корпорациясыны таматасы Чочайланы Ахмат къатышхандыла.
Казбек Коков регионнга салыннган муратланы бла борчланы туура этгенди. Бюгюнлюкде Россейни Правительствосу Шимал Кавказны айнытыуну стратегиясын 10 жылгъа жарашдыра тургъанын билдиргенди. Документде шарт борчла салынадыла эмда регионда жашагъанлагъа магъаналы болгъан битеу жумушланы толтурууну мадарлары белгиленедиле. СКФО-гъа кирген субъектле жууукъ заманлада айныуну стратегия планларын жарашдырыргъа эмда берирге, алада бек алгъа тамамланыллыкъ ишлени бла проектлени да кёргюзтюрге керекдиле.
Казбек Коков экономика эл мюлкде бла туризмде таянып айныргъа керек болгъанын чертип айтханды. Регионну стратегиясында ол бёлюмлени айнытыу жаны бла мадарла кёргюзтюлюрге керекдиле дегенди. Регионда инвестициялагъа ахшы онгла къурау эмда инфраструктураны ишлеу бла энчи иелиле ахчаларын салырча этиу – стратегияда белгиленнген ишлени тамамлауну баш амалыды, деп чертгенди.
Республиканы Башчысы регионну айнытыуну стратегиясына къошарча оюмланы хазырларгъа эмда инвесторла бла хайырлы ишлеуню къошакъ амалларын жарашдырыргъа буюргъанды.