Къэбэрдей-Балъкъэрым лэжьыгъэ IуэхукIэ къэкIуауэ щыIэ, Урысейм юстицэмкIэ и министр Чуйченкэ Константин кърихьэлIэу къызэIуахыжащ УФ-м ЮстицэмкIэ и министерствэм и Управленэу КъБР-м щыIэм и унэ къагъэщIэрэщIэжар.

Чуйченкэ Константинрэ КIуэкIуэ Казбекрэ пэшхэр къаплъыхьащ, IуэхущIапIэм и лэжьыгъэр къызэрызэгъэпэща щIы­кIэм зыщагъэгъуэзащ. Министрыр апхуэдэуи кIуащ УФ-м и Суд приставхэм я къэрал къулыкъущIапIэм и Управленэу КъБР-м щыIэмрэ Тезыр зытралъхьахэм егъэп­шыныжынымкIэ къэрал къулыкъущIапIэм и Управленэу КъБР-м щыIэмрэ.
ИужькIэ Чуйченкэ Константинрэ КIуэ-­кIуэ Казбекрэ ирагъэкIуэкIащ Урысей ­Фе­дерацэм ЮстицэмкIэ и министерст­вэм егъэ­щIылIа къулыкъущIапIэрэ Iуэ­ху­щIа­пIэу КъБР-м щыIэхэм я лэжьэкIэм ­теу­хуа зи чэзу Iуэхухэр щызэпкъраха зэIущIэ.
ЗэIущIэхэм хэтащ КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м лэжьыгъэмрэ цIыху­хэм социальнэ и лъэныкъуэкIэ къащхьэ­щы­жынымкIэ и министр Асанов Алим, Урысей Федерацэм ЮстицэмкIэ и ми­нистерствэм и Управленэу КъБР-м щы-Iэм и унафэщI Кужонов Жантемыр, Суд приставхэм я федеральнэ къулыкъу­щIапIэм и Управленэу КъБР-м щыIэм и унафэщI Бауаев Ахъмэт, Тезыр зытралъ­хьахэм егъэпшыныжынымкIэ къэрал къу­лыкъущIапIэм и Управленэу КъБР-м щы­Iэм и унафэщI Лыхь Аслъэн, КъБР-м и Уэчылхэм я палатэм и президент Гегиев Юрий, КъБР-м и нотариальнэ палатэм и президент Хьэкъул Майе, ЦIыхухэм я граждан щытыкIэхэр тхынымкIэ управ­ленэу КъБР-м щыIэм и унафэщI ПIаз Юлие. 
ЗэIущIэхэм щызэхалъхьэжащ IуэхущIапIэхэм я лэжьыгъэм кърикIуахэр, ап­хуэ­дэуи граждан жылагъуэм и институтхэр гъэ­­зэщIакIуэ властым и органхэм зэра­дэ­лажьэ щIыкIэми щытепсэлъыхьащ.
КIуэкIуэ Казбек Чуйченкэ Константин фIыщIэ хуищIащ Къэбэрдей-Балъкъэ­рым къызэрыкIуам икIи республикэм и правовой, социальнэ зэпIэзэрытагъыр зэ­­лъытауэ щыт Iуэхухэм гулъытэ зэрахуи­щIам папщIэ. Республикэм и Iэтащхьэм къыхигъэщащ къалэн къэувхэр гъэзэщIа хъун щхьэкIэ къэрал къулыкъущIапIэхэм я къудамэу щIыналъэм щыIэхэмрэ республикэм и гъэзэщIакIуэ властым и органхэмрэ быдэу зэпыщIауэ зэрызэ­дэ­лэжьапхъэр, апхуэдэуи абы и сэбэп екIын хуейщ республикэм щыпсэухэм хуащIэ къэрал Iуэхутхьэбзэхэм я фIагъыр къэ­Iэтыным.
КъБР-м и Iэтащхьэмрэ
Правительствэмрэ я
пресс-IуэхущIапIэ.