Нальчикде къан алыучу станциягъа не заманда барсам да, адамла кёп болуучудула. Аланы бирлери къанны алыргъа, башхалары уа берирге келедиле. Насыпха, экинчилери асламдыла.  Бек алгъа уа ары кюн сайын  эрттенликде сагъат сегизге  Республикалы сабий клиника больницаны гематология эмда онкология бёлюмюню ишчилери жетиучюдюле. Алагъа донорланы  магъаналылыкъларын айтыр кереклиси жокъду, ала къан керекли  саусузланы кюн сайын да кёредиле.
Бу жол мен  станциягъа сагъат тогъуз бола баргъанма. Ол кезиуге  ары адамла  аз-аз жыйыла башлайдыла. Аланы араларында  Черек райондан  Къараланы Мадина да барды. Ол биринчи кере келмейди бери къан берирге.   
-Къыйын саусуз сени хайырынгдан  аягъы юсюне болса, ол манга къууанчды, ёхтемди. Мен мында ишлеген врачлагъа, медсестралагъа да бек ыразыма. Ала хар  келгеннге бек сакъдыла,  ишлерин уста биледиле. Биз тамблагъы  кюнню юсюнден сагъыш этерге, бир бирге билеклик этерге керекбиз. Быллай болушлукъну сакълагъанла кёпдюле, ол себепден аз да къошумчулукъ эталгъаныма бек ыразыма, - дейди  Мадина.
Росреестрни  управлениясыны район бёлюмюнде специалист-эксперт болуп  ишлеген  Къараланы Мадина къан берип тургъанлы он жылдан атлагъанды. Биринчи кере уа ол огъурлу жумушну  анасыны эгечи, ауруп, больницагъа тюшгенинде этгенди. Анга мычымай къан керекди дегенни эшитгенлей, арсарсыз станциягъа тебиреген эди.
Къан алыучу станцияны  бёлюмюню таматасы Аза Дударова бла ушакъ этгенимде уа, ол  былай айтханды: «Донорлукъ  этиу, огъурлу иш болгъаны бла бирге, саулукъгъа да жарайды. Буруннгулу акъылман Авиценна Ибн Сина къан алыу  бла бакъгъанды. Ол амал къанны  жангыртыргъа, къурамын игилендирирге болушады. Аллай профилактиканы жюреклери, къан тамырлары, бауурлары, аш орунлары эмда башха затлары къыйнагъан саусузлагъа хайырланса  игиди».
Ол дагъыда кёпле кеслерине къаратыргъа ашыкъмагъанларын эсгертип, алада уа къанны кёп жаны бла тинтгенлерин, бир-бир аурууланы, вирусланы да  ачыкълагъанларын айтханды. 
-Бюгюнлюкде адамны къанын алышындырырча  препарат къуралмагъанды,-деп бардырады ушагъыбызны андан ары Аза Дударова. -  Ол себепден донорну магъанасы уллуду. Аны  Черек районда кёпле  иги ангылайдыла. Аны себепли аланы бир-бирлерини  атларын  хурмет бла айтыргъа сюеме. Россей Федерацияны сыйлы донору  Байсыланы Харунну, дайым да къан бериучюле Тогъузаланы Ёсканы бла Юраны энчи белгилерчады.  Къараланы Мадина уа бек ариу, тири  донорларыбыздан бириди. Ол бери, станциягъа да терк-терк келеди, биз ары барсакъ да, мычымай жетеди.

Холаланы Марзият.
Суратланы автор алгъанды