КъМР-ни Башчысы Казбек Коков Регионланы айнытыу жаны бла правительстволу комиссияны РФ-ни Правительствосуну Председателини орунбасары Марат Хуснуллинни башчылыгъы бла бардырылгъан жыйылыууна къатышханды.
Кенгешде Россейни Президентини адамланы юйлерине хакъсыз газ тартыуну юсюнден буйругъун регионлада толтурууну планы, Россей Федерацияда газ бла жалчытыуну юсюнден законнга кийирилген тюзетиуле сюзюлгендиле. Законнга кёре, «ахыр милягъа» - юйден газ быргъыгъа дери жол узунлугъуна отлукъну тартыу къыралны боюнундады.
РФ-ни Правительствосу тийишли норматив актла жарашдыра турады. Газификацияны бир операторуну институту сингдириледи. Анга «Газпромну» неда аны компаниясын тийишли кёргендиле. Субъектле уа кёк отлукъдан къаллай бир керек болгъанын кеслери тергерге керекдиле. Газификацияны регион программалары ма анга кёре къураллыкъдыла.
Алгъаракълада Санкт-Петербургда Казбек Коковну «Газпром межрегионгаз» ООО-ну генеральный директору Сергей Густов бла ишчи тюбешиую болгъанды. Анда сёз регионда къошакъ халда газ тартыуну юсюнден баргъанды. Къабарты-Малкъарда беш мингден артыкъ юйню отлукъ бла жалчытыргъа керекди. Бу ишни быйыл ноябрьде башларгъа белгиленеди. Анга 600 миллион сом чакълы къоратыллыкъды.
Правительстволу комиссияны жыйылыуунда дагъыда «Жашау журтла эмда шахар болум» миллет проектде белгиленнген ишлени тамамлауну онглары да сюзюлгендиле. Къабарты-Малкъарда быйыл жашау журтладан 513 минг квадрат метри хайырланыргъа берилликди. Кёп фатарлы 64 юй ишлене турадыла. Ол проектни чеклеринде 2022-2023 жыллада Нальчикде энчи иели юйле ишленнген беш микрорайонда таза суу бла жалчытыучу, кир суула барыучу инженер системаланы къурулушларын бардырыргъа белгиленеди.
КъМР-ни Башчысыны бла Правительствосуну
пресс-службасы.
