Къабарты-Малкъар къырал аграр университетде «Къурулушда, табийгъатны тапландырыуда эмда эл мюлк производствону механизациясында инновациялы амалла» деген темагъа аталып Битеуроссей илму-сынам конференция бардырылгъанды бу кюнледе. Илму форум къурулуш эмда землеустройство факультетде ётгенди. Анга республикадан талай ведомстволаны эмда тыш регионладан аграр вузланы келечилери къатышхандыла.
Конференцияда бизни регионнга магъаналы болгъан проблемала кётюрюлгендиле. Алимле ырхы сууланы кючюн тергеуню, аламдан тюшюрюлген суратланы жерчиликде хайырланыуну, жауун суула басаргъа боллукъ тийрелени белгилегенде, инженер-гидрология амаллагъа таяныуну юслеринден хапарлагъандыла. Кадастрны айнытыугъа, жерлени эмда табийгъатны хайырланыугъа аталгъан докладла да болгъандыла.
Табийгъат къолайлыкъны аяулу хайырланыуда комплекс халда инвестиция-экономика амал жарашдырыргъа кереклисин белгилеген эдиле форумда. Аны мурдоруна Узакъдагъы Востокда, Красноярскеде эмда Къабарты-Малкъарда аграр вузланы сынамларын салыргъа келишгендиле.
Сюзюуге чыгъарылгъан сорууланы арасында дагъыда эл мюлк техниканы КПД-сын кётюрюу, жерлени суу ашагъандан эмда заранлы къурт-къумурсхаладан къоруулау, мекямланы конструкцияларын жарашдырыу, тау жайлыкъланы айнытыу дегенча аллайла да бар эдиле. Эллени айнытыуда инвестицияланы, къурулушну эмда жеринден тепдирилмеген мюлкню эм башына салыргъа деген темагъа жораланнган кенгешде кёп башха-башха оюм айтылгъанды. Анда жол инфраструктураны айнытыуда кемчиликлени ачыкълагъан, ЖКХ сферада бирикген информация системаны таплыгъын баямлагъан, проект оноу этиу амалны энчиликлерин туура этген докладла болгъандыла.
Конференциягъа къатышханла агропромышленность продукцияны чыгъарыуда производстволу техниканы эмда ресурсланы аягъан технологияланы игилендирирге барыргъа кереклисин бирча белгилегендиле. Докладла эмда башха материалла жыйымдыкъ статьялача басмаланырыкъдыла, деп билдиргендиле вузну пресс-службасында.