Къабарты-Малкъарны Башчысы Казбек Коков Петербург экономика форумда ишни эсеплери бла байламлы кенгеш бардыргъанды. Ол форумда кёргюзтюлген Россей Федерацияны субъектлеринде инвестиция халны миллет рейтингини эсеплерине кёре Стратегиялы башламчылыкъла агентствону шартларын келтиргенди. Къабарты-Малкъар Республика инвестициялы климат интеграл ёсюу кёргюзтген 40 регионну санына киргенди. Былтыр бла тенглешдиргенде, ол 17 оруннга кётюрюлюп, 250,2 балл болгъанды. Бардырылгъан тинтиуге кёре битеу 85 регион да 29 жерге юлешиннгендиле, аланы араларында республика 16-чы жердеди, ол жаны бла айнып.
Кенгешге КъМР-ни Правительствосуну Председатели Мусукланы Алий, КъМР-ни Башчысыны Администрациясыны таматасы Мухамед Кодзоков, республиканы Правительствосуну Председателини биринчи орунбасарлары Муаед Кунижев эм Сергей Говоров, Правительствону Председателини орунбасары Марат Хубиев, экономиканы айнытыу министр Рахайланы Борис къатышхандыла.
Казбек Коков белгилегенича, рейтинг инвестициялы климатны игилендириу жаны бла толтуруучу власть органланы ишлерине багъа бичер ючюн бардырылады. Оноучу туризм, эл мюлк, жашау журт къурулуш дегенча бёлюмледе ол бек магъаналы болгъанын чертгенди.
2021 жылны миллет рейтинги 42 кёрюмдюге эм 4 ызгъа кёре саналыргъа тийишлиди: «Регуляторная среда», «Бизнесге деп институтла», «Инфраструктура эм ресурсла», «Гитче предпринимательствогъа билеклик». Предпринимательлени эм экспертлени жууапларыны эсеплери да эсге алыннганды, ол санда статистика шартла да.
Кенгешде къуралгъан тюбешиулени эсеплери, инвесторла бла байламлыкъланы онглары, регионла аралы байламлыкъла жаны бла муратла да сюзюлгендиле. Башчы республиканы Правительствосуна регионда инвестиция халны мындан ары игилендирирча ишни тирилтирге борч салгъанды.
Къурулушха эркинлик берген, ырысхы эркинликлени регистрация этген, электросетьлеге эм башха коммуникациялагъа къошулуу жаны бла къырал жумушланы тапдырыуда качествону игилендирирге эм заман болжалланы къысхартыргъа тийишлиди. «Гитче эм орта бизнесни айнытыуну эм экономикагъа инвестицияланы келиулерин игилендириу болумланы къурауну юсюнден регионну предпринимательлик биригиую бла ачыкъ ушакъланы мындан ары да бардырыргъа керекди», - деп чертгенди Казбек Коков.
