Ёсе келген тёлюлени ариу халда юйретиуде, аланы кюч-къарыу, ниет жаны бла да чыныкъдырыуда спорт, айхай да, уллу магъананы тутады. Гитче гёжефлени араларында эришиуле уа хорламгъа итиниулюклери бла абаданланы араларында бардырылгъанларындан артха къалмайдыла. Аллай умутландыргъан спортчуларыбыздан бири Жабелланы Халитди.
Халид Жабелланы Хасанны бла Зухраны юйюрлеринде 2013 жылны 12 сентябринде туугъанды. Ол Нальчикни 1-чи номерли гимназияны 1-чи классында окъуйду. Спорт бла уа алты жылында кюрешип башлагъанды. Алгъа атасы бла анасы аны гимнастикагъа бергендиле, грепплинг бла уа жыл бла жарымны кюрешеди.
Сынамы алыкъа аз болгъанлыкъгъа, Халид жетишимлери бла къууандыргъанлай турады. Кесини биринчи эришиуюнде ол доммакъ майдалны къытханды. Кёп болмай а СКФО-ну биринчилигине айырыу эришиуледе хорлагъанды. Анда жаш юч сермеш бардыргъанды, аладан экисинде болжалдан алгъа къытханды. Эришиуню аллында бир кесек жарсый эсе да, эс жыйып, хорлар ючюн битеу кючюн сала биледи.
Аны тренер Юнус Рустам юйретеди. Халид залгъа сюйюп жюрюйдю, тренери айтханны кёл салып толтурады. Жашчыкъ окъуууна да сакъды, жарау дерслерине чырмау этмейди. Ол угъай, кёп болмай тхэквондо бла кюрешип, жюзюуге да жюрюп башлагъанды. Бош заманында уа легодан тюрлю-тюрлю машиналаны ишлерге сюеди.
