КъМР-ни Транспорт эмда жол мюлк министерствосу «Къоркъуусуз эм тынгылы автомобиль жолла» миллет проектни чеклеринде ызлагъа болжалдан кеч къалмай ремонт этилирине дайым контроль этгенлей турады. Аны юсюнден ведомствону пресс-службасы билдиреди.
Специалистле подряд организацияла бла келишим къураугъа, проектни документациясын жарашдырыугъа, ремонт башланнгынчы асфальт заводланы хазырлыкъларына, ишле къалай баргъанларына да дайым кёз-къулакъ болгъанлай турадыла, ахырында объектлени халларына энчи комиссия къарайды.
Жолланы жангыртыуда качестволу материалла хайырланыргъа эм тохташдырылгъан мардала бла излемле да сакъланыргъа керекдиле. Ол себепден ишле башланнганчы окъуна асфальтны къурамы республиканы Жол мюлк управлениясыны лабораториясында тинтиледи.
- Ол ГОСТ-ха эмда башха излемлеге келиширге тийишлиди. Ол себепден асфальтны бир кесеги тинтиуге алыннгандан сора участоклада да тюрлю-тюрлю шартлагъа эс бурулады. Бир тюрлю бузукълукъ ачыкъланса, ол жараусузгъа саналады эм аны чыгъарыу тохтатылады. Бу кюнледе тинтиуле Нальчикни тёгереги бла эм Куба элге баргъан жоллада да ётдюрюлгендиле,- дейди качествогъа контроль бардыргъан бёлюмню таматасы Ахматланы Алим.
Жол мюлк управленияны таматасы Тембулат Мзоков айтханнга кёре, асфальтны къурамындан башлап ишлени качествосуна дери специалистле кёз-къулакъ болгъанлай турадыла. Алай алыкъа уллу бузукъла табылгъандыла деп айтырча болмагъанды.
Эсге сала айтсакъ, алгъаракълада тынгылы ремонт ишле оналты объектде бошалгъандыла. Кёп болмай а КъМР-ни транспорт эмда жол мюлк министри Аслан Дышековну башчылыгъы бла ишчи комиссия Нартанда, Эски Черекде, Ново-Ивановское элледе участокланы болумлары бла шагъырейленнгендиле.
Ара орамлада мектепле, амбулаторияла, маданият юйле, спорт арала дегенча социал магъаналы объектле орналадыла. Ол себепден ызланы жангыртыу айбатлыкъ къошханы бла бирге, къоркъуусузлукъну жалчытыугъа да ахшы себепди.
Къонакълагъа муниципалитетлени администрацияларыны келечилери эмда жамауаты тюбегендиле. Аны чеклеринде жолчулагъа ыразылыкъ айтылгъаны бла бирге эсгертиуле да этилгендиле. Аланы кёбюсю сакъ жауунладан сора ырхыла салгъан заран бла байламлыдыла. Специалистле бар кемчиликлени да бир ыйыкъны ичинде кетерирге сёз бергендилее.
