Специалистле айтханнга кёре, Россейде 2023 жылгъа дери газ ызгъа хакъсыз эки миллионнга жууукъ юй къошуллукъдула, ол санда Къабарты-Малкъарда беш мингден аслам арбаз.
Эсге сала айтсакъ, РФ-ни Президенти Владимир Путин Федерал Жыйылыугъа Посланиясында къысха заманда юйлеге хакъсыз газ тартылырча мадар этерге буюргъанды. Ол жумушну кёк отлукъ бла жалчытхан бир оператор тындырыргъа борчлуду. Ол адамла къагъытланы бирден-бирге ташып айланмаз эм заманны созуп турмаз ючюн «бир терезе» амал бла тамамланыллыкъды.
Алгъа белгиленнгенича, программагъа жашау журтлары 300 квадрат метрден уллу болмагъанла къошулургъа эркин эдиле, жангы жорукъла кийирилгенлеринден сора аллай чекле кетерилгендиле. Программаны республикагъа магъанасыны юсюнден КъМР-ни Башчысы Казбек Коков «Газпром межрегионгаз» биригиуню таматасы Сергей Густов бла тюбешиуюнде да айтханды.
Проектге кёре, Къабарты-Малкъарда тийишли ишле быйыл ноябрьде башланырыкъдыла, алагъа 600 миллион сом чакълы бёлюнюрюкдю.