КъМР-ни Парламентинде «Мени законла жарашдырыу башламчылыгъым» республикалы конкурсда хорлагъанланы атлары белгили этилип, алчылагъа грамотала, лауреатлагъа уа дипломла берилгендиле.
Анга аталгъан къууанчлы жыйылыуну Билим бериу, илму эм жаш тёлюню ишлери жаны бла комитетни председатели Нина Емузова бардыргъанды. Окъуучуланы эм аланы илму башчыларын алгъышларгъа уа спикерни орунбасары Мурат Карданов, Урунуу, социал политика эм саулукъ сакълау комитетни таматасы Хусейн Кажаров, Экономика политика, инновация айнытыу эм предпринимательство, Жамауат къоркъуусузлукъ эм коррупциягъа къажау, Спорт эм туризм жаны бла комитетлени башчылары Заур Апшев, Михаил Кривко, Арсен Барагунов, депутатла Владимир Безгодько эм Светлана Пшибиева да келгендиле.
Окъуучуланы эмда аланы устазларын алгъышлай, Мурат Карданов жаш адамла законланы жарашдырыуда биринчи атламла этгенлерин чертгенди. «Бу жетишимде тохтап къалмагъыз деп тилерге сюеме. Быллай чыгъармачылыкъ жумушла уа фахмугъузну ачыкъларгъа, келир заманда усталыкъны сайларгъа болушадыла»,-дегенди ол.
Дагъыда, ол алгъын жыллада кёргюзтюлген ишле быйылдан тынгылы, магъаналы да болгъанларын айтып, келир кезиуде конкурсну даражасын кётюрюрге чакъыргъанды.
Нина Емузованы айтханына кёре уа, конкурсха 46 илму тинтиу кёргюзтюлгенди. Быйылдан башлап, битеу ишле антиплагиат системада сюзюледиле. Алай бла бир ненча сюзюу авторларына къайтарылгъандыла. Ол угъай, бирча ишле окъуна ачыкъланнгандыла.
Битеу да бирге конкурс 7 секциягъа юлешиннгенди. Экспертле бардыргъан тинтиуледен сора юч иш биринчи жерге тийишли кёрюлгенди. Экинчи жерге – эки эмда ючюнчюге да эки илму иш чыкъгъандыла. Алчыланы санына кирмеген, алай магъаналы оюмлары болгъан ишлеге уа лауреатланы дипломларын берирге оноу этилгенди. Аллайла сегиздиле.
Нина Гузеровна быллай конкурсла фахмулуланы, башламчылыкъла эте билгенлени ачыкъларгъа болушханларын чертгенди. «Жууукъ кезиуде биз жаш тёлю политика жаны бла законну сюзерикбиз, анга сизден оюмла сакълайбыз»,-дегенди ол.
Ызы бла саугъалау башланнганды. Алай бла битеу тинтиуледен сора биринчи жерге Нальчикни 27-чи номерли школуну окъуучусу Роман Денисовну иши тийишли кёрюлгенди. Ол экологияны проблемаларын кётюргенди. Нальчикни 14-чю номерли гимназиясыны окъуучусу Фатима Гешева уа жаш тёлю айырыу комиссияны къурауну, алай бла уа ёсюп келген тёлюню къол кётюрюуге къатышдырыуну амалларын тинтгенди. Парламентде Жаш тёлю палатаны келечиси Мокъаланы Альбина уа халкъны льготалы дарманла бла жалчытыуну игилендириуню юсюнден оюмун туура этгенди. Аланы ишлери да 1-чи жерге тийишли болгъандыла.
Хорлагъанланы депутатла да алгъышлагъандыла. Арсен Барагунов, ахыр кезиуде къыралда, республикада да туризмни айнытыугъа энчи эс бурулгъанын белгилеп, конкурсха ол жаны бла секция къошууну дурус кёргенди. Заур Апшев а жетишимлиликни жашырынлыгъы къадалып ишлеуде болгъанын айтханды. «Алай аны бла бирге ахшы ишле этигиз, чомарт болугъуз, таматалагъа тынгылагъыз»,-дегенди.
Ол кюн жетишимли окъуучуланы устазлары да белгиленнгендиле. Аланы арасында уа депутат Хусейн Кажаров, сабий чыгъармачылыкъны «Кюн шахар» академиясыны устазы Беккиланы Жанна эм башхала бардыла.
Тюбешиуню ахырында устазланы атындан Парламентге, конкурсну къурагъанлагъа ыразылыгъын айтып, Нальчикни 32-чи номерли школуну устазы Мадина Тайсоева сёлешгенди. Ол шёндюгю жаш тёлюню цифралы технологияладан билими иги болгъанын чертгенди. «Къыралны, республиканы да алгъа элтирик ма бу тёлюдю. Биз а алагъа ол жаны бла керекли билим беребиз»,-дегенди ол.
Роман Денисов, жаш адамланы атындан сёлеше, конкурс тинтиуню бардыргъан анга артыкъда сейир болгъанын белгилегенди. «Тенглерим да бу ишге тири къатышырла деп ышанама»,-дегенди эмда анга хазырланыргъа болушханы ючюн устазы Беккиланы Жаннагъа ыразылыгъын билдиргенди.
Тюбешиуню ахырында Нина Емузова, алчыланы санында районладан жашла бла къызла аслам болгъанларын белгилеп, мындан ары аланы саны кёбейиригине ышаннганын айтханды. «Быйыл бир энчилик барды – тинтиулени экспертлери депутатла болгъандыла. Ол а игиди. Парламент хар адамгъа, ахшы башламчылыкъгъа, оюмлагъа ачыкъды»,-дегенди ол.
Бу къууанчлы кюн жашланы бла къызланы эслеринде къалыр ючюн а ала депутатла бла бирге суратха тюшгендиле.
