Нальчикде автогородок ачылгъанды, аны бла бирге уа жолда жюрюуню жаш инспекторларыны «Къоркъуусуз чарх» конкурсу да болгъанды.
Анга аталгъан къууанчлы жыйылыугъа Экономика эм жамауат къоркъуусузлукъ советина башчысы Казбек Татуев, ич ишле министр Василий Павлов, жарыкъландырыу, илму эм жаш тёлюню ишлери жаны бла министр Анзор Езаов, транспорт эм жол мюлк министр Аслан Дышеков эм башхала къатышхандыла.
Конкурсну юсюнден айтханда, ол тёрелиге айланнганын эмда 35 жылны ичинде бардырылады. Быйыл анга республиканы битеу районларындан 12 команда къатышханды.
Эришиуле башланырдан алгъа уа жангы автогородокну ачылыуу болгъанды. Ол КъМР-де баш къыралавтоинспектор Роберт Яльмеевни башламчылыгъы бла къуралгъанын белгилерчады.
Казбек Татуев жыйылгъанланы бу иш бла алгъышлай, бюгюнлюкде жолда сабийлени къоркъуусузлукъларын жалчытытыу соруула къуру власть органланы угъай, саулай жамауатны да къайгъыртханларын, ол социал магъаналы жумуш болгъанын белгилегенди.
«Къызыл бауну» кесгенден сора эришиуле башланнгандыла. Школчула жолда жюрюуню жорукъларын къалай билгенлерин, аякъ машинада къалай жюрюгенлерин, аварияда ачыгъанлагъа биринчи медицина болушлукъну бериуню энчиликлерин да кёргюзтгендиле. Битеу да бирге уа жашлагъа бла къызлагъа 6 конкурсда эриширге тюшгенди.
Хорлагъанланы алгъышлай, ич ишле министр Василий Павлов окъуучула иги билим кёргюзтгенлери ючюн ыразылыгъын айтханды. «Республиканы хар районунда да билимли жаш инспекторларыбыз бардыла, керек болса, ала адамгъа болушаллыкъдыла, деп ёхтемленирге эркинбиз. Солуу кезиу башланнганды, иги солуп, саулугъугъузну игилендирип, окъуугъа алай къайтыгъыз»,- дегенди ол.
Быйыл а республикалы конкурсда Бахсан районну жаш инспекторлары хорлагъандыла. Дагъыда эришиулени хар бёлюмюнде алчыланы атлары белгили этилип, грамотала, дипломла, алагъа саугъала берилгендиле.
