КъМР-ни Башчысыны указы бла экономиканы айнытыугъа уллу къошумчулукъ этгени эмда кёп жылланы жарыкъ бетли уруннганы ючюн энчи предприниматель, КФХ-ны таматасы Жаппуланы Жаннет Къабарты-Малкъар Республиканы Сыйлы грамотасы бла саугъаланнганды. Россейде предпринимательствону кюнюн белгилеуге аталып берилген саугъаны кесине регионну экономиканы айнытыу министри Рахайланы Борис тутдургъанды, деп билдиргендиле ведомстводан.
Жаппуланы Жаннет предприятиясын Жанхотияда тёрт жыл мындан алгъа ачханды. Битеу Шимал Кавказда роботланы биринчи хайырланып башлагъан мюлк да ма олду. КФХ-ны генеральный директору Насталаны Джамиля билдиргеннге кёре, аны къурулушу 2016 жылда ноябрьде башланнганды. Проектни багъасы жюз миллион сомдан артыкъды. Швиц ийнеклени (132-син) Австрияда сатып алгъандыла. Оборудованияны уа Швейцариядан «Де Лаваль» компания орнатханды.
«Ийнек бла не бола эсе да оборудование аны барын да контрольда тутады. Аны ауурлугъун, неллай бир сют бергенин, къачан бузоу тапханын робот эсеплеп, компьютерге тюшюрюп турады», - дейдиле мюлкню ишчилери. «Техника бары да тынгылы ишлейди. Бир суткагъа эки тонна сют сауабыз. Аны Нальчикде сют комбинат алады», - деп къошханды аны башчысы.
Бара-баргъан заманлада предприятияда Германияда чыгъарылгъан энтта да бир производстволу ыз орнатыргъа умутлудула. Андан сора да, мюлкде мингден артыкъ тууар багъадыла.
«Жаннет Хызыровнагъа бла Джамиля Алисолтановнагъа таза жюрекден жетишимле, предприятие андан ары айнырын тежейбиз. Республикада агропромышленность сферагъа иги къошумчулукъ этгенлери ючюн ыразылыгъыбызны билдиребиз», - дегендиле министерствода.