КъМР-ни Башчысы Казбек Коков тюнене Санкт-Петербургга халкъла аралы форумгъа къатышыр ючюн жангы рейс бла учханды. Нальчикден Санкт-Петербургга хауа жолну «Россия» авиакомпания майны ахырында ачханды. Биринчи кере Нальчикге ол рейс бла самолёт 90 процентге толуп келгенди. Ол а маршрутну магъаналылыгъын кёргюзтеди.
Учарны аллында уа Казбек Коков «Нальчик» аэропортну баш директору Виталий Беланов бла тюбешгенди. Ала Нальчикни аэропорту «Новапорт» авиакомпаниягъа къошулгъаны бла байламлы адамланы, жюклени да хауа жол бла ташыуну кёбейтиуню онгларын сюзгендиле. Сёз аэродромну магистраль инфраструктурасын кенгертиуню, жангы аэровокзал ишлеуню, шёндюгюн жангыртыуну юсюнден баргъанды. Ол тюрлениулени компания быйыл башларгъа айтады.
-Бюгюнлюкде биз кеси аэропортубуздан учабыз Санкт-Петербургга, башха жерледе ары-бери кёче турмай. Ол бек магъаналыды. Бизнесге, туризмге да айныргъа иги онгла ачыладыла»,-дегенди республиканы оноучусу.
Экономика форумну юсюнден айта, Казбек Коков туризмни айнытыугъа да эс бургъанды. «Анда биз Нальчикни курорт тийрелерин къалай тюрлендирлигибизни кёргюзтюрюкбюз. Аны проектин тюнене алгъанбыз. Андан сора Минги тауну, Чегем ауузуну туризм онглары бла шагъырейлендирликбиз»,- дегенди ол.
