Кёп болмай Черек муниципал районну башчысы Этезланы Мухамматны башчылыгъы бла кенгеш болгъанды. Ол 2020 жыл бюджетни жалчытыуну эсеплерине эм башха соруулагъа жораланнганды.
Былтыр бюджет къалай толтургъаныны юсюнден финансла жаны бла управленияны таматасы Шахманланы Марзият доклад этгенди. Ол айтханнга кёре, районда налогладан 82,9 миллион сом эм бирси бёлюмледен да 18,1 миллион сом файда тюшюрюлгенди. Ол санда 8,4 миллион сом хакъ тёленнген жумушла ючюн жыйылгъанды.
Районда ОМВД-ны ишини юсюнден бёлюмню таматасыны орунбасары, полицияны подполковниги Артур Эльчапаров хапарлагъанды. Ол, буруннгу жыл бла тенглешдиргенде, былтыр 38,8 процентге кёп аманлыкъчылыкъ ачыкъланнганын билдиргенди. Аны бла бирге жолда аварияланы саны эки кереге азайгъанын, аланы чеклеринде 19 адам ачыгъанын эм 2-си ёлгенин сагъыннганды.
Болсада арт заманда тоноуланы санына къошула баргъанын, айтылгъан кезиуде 30 бузукълукъ тинтилгенин айтханды. Аланы арасында IT-технологияланы хайырланнганла да бардыла. Ахырында Артур Анатольевич коллегалары бла бирге мындан арысында да аманлыкъчыланы жолларын кесер ючюн кючлерин аямазлыкъларын чертгенди.
Ызы бла Черек районну уставына тюрлениуле сюзюлгендиле. Депутатла саугъалагъа тийишли кандидатураланы да айыргъандыла. Ол кюн кётюрюлген соруула бла байламлы эсгертиуле этилгендиле.
