Кёп болмай «Экология бизни барыбызны да ишибизди» деген проектге кёре «Экологистика» операторну баш офисинде, зыбыр къалгъан-къулгъанла (ТКО) бла байламлы соруулагъа жораланып, жарыкъландырыу семинар болгъанды. Анга КъМР-ни Къурулуш эмда жашау журт-коммунал мюлк, Табийгъат байлыкъла эм экология министерстволарыны, шахарны администрациясыны келечилери, школчула, студентле эм башхала къатышхандыла.
Жыйылыу къалгъан-къулгъанланы жюрютюуню юсюнден презентация бла ачылгъанды. Анда быллай шартла келтирилгендиле: бюгюнлюкде Россейде эркинликсиз багуш тёгюлген жерле 40 000 минг квадрат метрге жетедиле. Орта эсеп бла алып айтханда, хар адам кюннге бир килограмм кир-кипчик атады.
Тюбешиуде специалистле свалкагъа ташылгъан сырьёну жарашдырырча мадарланы юсюнден да толу хапарлагъандыла. Ахырында республикада экология болумну игилендирирча проектлени конкурсу бардырылгъанды. Эсепле чыгъарылгъанларындан сора хорлагъанлагъа грамотала бла эсде къалырча саугъала берилгендиле.
Бу жол семинаргъа къатышханла, теориядан сора да, «Урвань» полигонда къалгъан-къулгъанланы жарашдыргъан заводну иши бла да шагъырейленип сынамларын кючлерге онг тапхандыла. Ол шарт экология болумгъа аяулу кёзден къараргъа бютюн ахшы себеплик этерикди.