КъМР-ни Башчысы Казбек Коков Зольск муниципал районнга иш бла баргъанды. Каменномосткое элде ол бу кюнледе буз уруп, башын халек этген школну жокълагъанды. Районну администрациясыны башчысы Руслан Гятов, элни таматасы эмда билим бериу учрежденияланы оноучулары бла тюбешгенди.
Мектепге къарап чыкъгъандан сора Казбек Коков аны башын алышындырыуну эмда керекли ремонт этиуню проект-смета документациясын хазырларгъа буюргъанды.
Быйыл дагъыда районда эки школгъа тынгылы ремонт этилликди. Аланы федерал программагъа къошаргъа къолдан келгенди. Сёз Залукокоажеде бла Малкада орта окъуу юйлени юслеринден барады. Тёбен Черекде мектепни да жангыртыргъа белгиленеди.
Аны юсюнден республиканы Башчысы быйыл февральда элге баргъанында оноу этген эди. Битеу ол объектледе ремонт ишле жууукъ заманлада башланырыкъдыла.