«Каббалкэнерго» компанияны башламчылыгъы бла, Ростехнадзорну КъМР-де Управлениясыны эмда Нальчик шахар округну администрациясыны келечилери да къатышып, ведомствола аралы кенгеш болгъанды бу кюнледе. Анда шахарда къурулуш ишле бардыргъан кезиуде организацияла электрокюч ызланы юзген кезиуле терк-терк тюбеп башлагъанына эс бурулгъанды. Жыйылыуну аллында ведомстволаны келечилери аллай жерлени бир кесегине барып къарагъандыла.
Компанияда айтханларына кёре, жаланда быйыл аллай он бузукълукъ этилгенди. Аны хатасындан сау микрорайонла токсуз къалгъандыла. Сёз ючюн, ахыр кере къурулушчула «Тарчоков-Театральная» районну жалчытхан, кеси да жер тюбю бла баргъан аллай ызны юзгендиле. Тёгерекде уа къадар юй, социал объектле… Подряд организацияны адамлары къазгъан уру асыры кенг эмда терен болгъаны ючюн энергетикле, тюшюп, ток ызны жалгъаялмай кёп тургъандыла. Къалай-алай болса да, талай замандан ишлерин тындыргъандыла.
Энтта да бир шарт – иели юйню ишлей тургъанда, бетон къуйгъан машина алайда бийик вольтлу (6 кВ) ызны юзгенди, аны тутхан бир ненча чыпынны да аудургъанды. Эл саулай электрокючсюз къалгъанды. Бир игиси, не водительни, не алайлада ишлей тургъан адамланы ток урмагъанды.
Быллай затла болмаз ючюн алай кёп керекмейди, ишни башларны аллында къурулушчула энергетиклеге билдирип, аладан эркинлик алыргъа борчлудула. Ол бош излем тюйюлдю, аны бла байламлы энчи жорукъла бардыла. Кенгешге къатышханла аны дурус кёргендиле, профилактика амалланы кючлендирирге, бузукълукъ этгенлени уа жууапха тартыргъа кереклисин чертгендиле. Андан сора да, къурулуш организация энергетиклени аварияланы кетериу бла байламлы къоранчларын жабаргъа керекдиле деген оюмгъа келгендиле.
Ахырында компанияда къайтарып эсгергендиле: ток ызланы тийрелеринде къурулуш ишле бардырыргъа, мекямлагъа ремонт этиу бла кюреширге, мал орунла, стоянкала, складла, солуу лагерьле къураргъа, гаражла орнатыргъа, кир-кипчик тёгерге, ойнаргъа, тереклеге ёрлерге, кран бла жюклени кётюрюрге чыртда жарамайды. Жолдан 4,5 метрге бийик болгъан не тюрлю техникагъа да алайлада жюрюрге чек салынады. Бузукълукъ этиле тургъанын неда ток ызла юзюлгенлерин эслесегиз, 8 800 220 0 220 телефон номер бла сёлешигиз. Эсигизде болсун, жууаплылыкъ эмда жорукълада айтылгъанны толусунлай толтуруу жарсыулу болумладан кери этерикди.
