Къабарты-Малкъарны Башчысы Казбек Коков Санкт-Петербургда бардырылыучу халкъла аралы экономика форумгъа къатышырыкъды. Ол 2 июньда башланырыкъды.
– Форумгъа келишимле хазырлап барабыз. Адамланы солууларын къурау онгларыбызны, эл мюлкде жетишимлерибизни кёргюзтюп, башха регионла бла бирге ишлеуню кенгертирге мурат этебиз. Росгеология бла келишиулюкню артыкъда магъаналыгъа санайбыз. Анга кёре инфраструктураны республиканы экономика эмда социал жаны бла айныууна экспертле берген багъаны эсге алыу бла къураргъа белгиленеди.
Быллай даражалы кенгешге къатышханыбыз ишчи байламлыкъланы бютюн кёбейтирге онг береди, жангы проектлеге кёллендиреди, - дегенди Казбек Коков.
Форум бла байламлы жумушла «Экспофорум» конгресс-кёрмюч арада ётерикдиле. Казбек Коков Къабарты-Малкъарны делегациясына башчылыкъ этеди. Ол РФ-ни Президенти В.В.Путин сёлешиучю пленар жыйылыугъа эмда РФ-ни Къырал советини комиссиясыны экономикагъа бла финанслагъа жораланнган уллу кенгешине къатышырыкъды.
Экономика форумну кезиуюнде бизни делегациябыз ишчи тюбешиуле, сёлешиуле да бардырлыкъды, ахырында хазырланнган документлеге къол салыу боллукъду. Ол санда «Росгеология» АО бла бирге ишлеуню юсюнден келишим эмда КъМР-ни бла Санкт-Петербургну правительстволарыны араларында келишимни толтуруу жаны бла мадарланы планы къабыл кёрюллюкдюле. Дагъыда Новосибирск область, Удмуртия эмда Коми республикала бла байламлыкъланы юсюнден договорланы бегитирге белгиленеди.