Москвада Кинону ара юйюнде бу кюнледе «Черкес-фильм» кинокомпанияны генеральный директору, кинорежиссёр Аскарбий Нагаплевни «Подвиг милосердия» деген документли фильми биринчи кере кёргюзтюлгенди. Ол ХХ ёмюрде чюйютлюлени, башха миллетлени да холокостну заманларында этген адамлыкъ жигитликлерини бла жигерликлерин юсюнден хапарлайды. Сёз ючюн, гитлерчиле Шимал Кавказгъа киргенлеринде, Къарачай-Черкес Республикада, Адыгеяда да кёпле чюйютлюлени сабийлерин кеслерине къыз, жаш этип алып, ёлюмден къутхаргъандыла.
Бу документли кино уруш жыллада жашауларына къоркъуу тюшюп тургъанлай, аллай жандауурлукъ этгенлени атлары ёмюрде да унутулмазча эмда халкъланы, миллетлени, динлени араларында къарындаш, шуёх байламлыкъла бютюн кючленирча этиуге бурулупду.
Блокадалы Ленинграддан чюйютлю сабийлени къутхарыуну юсюнден шартла Уллу Ата журт урушну тарыхында артыкъ белгили тюйюлдюле. Не уа алгъыннгы Совет Союзда, бусагъатдагъы Россей къыралда ол адамланы этген кишиликлери бир жерде да, бир заманда да белгиленмегенди. Ма аны себепли бу фильм холокостну кезиуюнде жоюлгъанлагъа, ол къыйынлыкъгъа тюшмей къутхарылгъанлагъа да жораланады.
Фильмни презентациясына кёп адам келгенди. Аланы араларында Россейни Кинематографистлерини союзуну председатели Лариса Солоницына, бу чыгъармачы биригиуге кирген, Кинону музейини директору Валерий Тонких, Къабарты-Малкъардан Дуния Артий комитетни Шимал Кавказда представительствосуну председатели Ауес Бетуганов, жырчы Заур Тутов, дагъыда кёп башха белгили адамла болгъандыла.
Кинодан сора кёпле чыгъып сёлешгендиле эмда аны магъанасы уллу болгъанын чертип айтхандыла.
Фильмни режиссёру Аскарбий Нагаплев Адыгея Республиканы Ходзь элинде туугъанды. Ол уруш жыллада чюйютлю сабийлени немислиледен къутхаргъан адамладан, ол заманда башха миллетлени юйюрлерине тюшген къызлагъа бла жашлагъа тюбеп, хапар соруп салгъанды киносун.
Ол дагъыда документли чыгъармаланы авторуду. Аланы хазна къалмай бары да арап, ингилиз, тюрк тиллеге кёчюрюлгендиле. Краснодарда, Санкт-Петербургда, Нальчикде, Черкесскде, Тюркню кёп шахарларында, Иорданияда, Парижде ЮНЕСКО-ну штаб-фатарында, Германияда, Кельнде да кёргюзтюлгендиле.
