Къабарты-Малкъаргъа КовиВак вакцинаны биринчи кесеги келтирилгенди – битеу да 2340 адамгъа жетерча. Ол КъМР-ни Саулукъ сакълау министерствосуну Ара аптека складыны холодильниклеринде сакъланады эмда бу жууукъ кюнледе республиканы дарман салыучу шахар эмда район пунктларына юлешинирикди.
КовиВак – Россейде коронавирусха къажау вакцинаны регистрация этилген ючюнчю тюрлюсюдю. Аны Чумаков атлы илму ара жарашдыргъанды. Вакцина вирусну ёлген кесекчиклеринден къуралгъанды. Ала адамгъа бир тюрлю хата келтирмейдиле. Дарман организмге тюшсе, вирусну антиген къурамын танып къояды эмда аны эсде тутады. Артда уа вирусну не тюрлю тюрлениулерине да хазыр болуп къалады.
Чумаков атлы араны алимлери айтханнга кёре, адамгъа КовиВак дарман салыннгандан сора, COVID-19-гъа иммунитет 42 кюнден сора къуралады. Аны болжалы адамны жыл санына эмда чархыны энчиликлерине кёре болады.
Вакцинаны жарашдыргъанланы оюмларына кёре, КовиВак тюрлене тургъан штаммладан да къоруулаяллыкъды, нек дегенде аны къурай туруп, вирусну геномуну бир кесеклерин угъай, саулай хайырланнгандыла.
Алимле бу дарманны жыл санлары 18-ден башлап 60-ха дери жетген адамлагъа салыуну дурус кёредиле. Сабийден ауурлукълары болгъанлагъа, къагъанакълагъа ёшюн салгъанлагъа уа аны хайырланыргъа жарамайды. Андан сора да, бу дарманны салдыргъандан сора адамны хали осалгъа кетсе, сёз ючюн, температурасы 40 градусха дери кётюрюлсе неда аллергиясы къозгъалса, вакцинаны жангыдан этдирирге жарамайды.
КовиВак энчи болумланы излемейди. Аны +2 - +8 градусда сакъларгъа эмда кёчюрюрге боллукъду.