КъБР-м и Iэтащхьэ КIуэкIуэ Казбек ири­гъэкIуэкIащ зи чэзу «муниципальнэ сыхьэт» зэIущIэр.
Абы хэтащ КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэ­дзокъуэ Мухьэмэд, КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим, муници­пальнэ зэгу­хьэныгъэхэм я администрацэхэм я Iэтащхьэхэр.
Мусуков Алий зэIущIэм хэтхэр щы­-гъуазэ ищIащ лъэпкъ проектхэр гъэзэщIа зэрыхъу щIыкIэм. Республикэм и жылэхэр псыкIэ къызэгъэпэща зэрыхъум ехьэлIа Iуэхухэр зэпкърахащ.
КIуэкIуэ Казбек къыхигъэщащ республикэм щыпсэухэм иджыпсту ирикъуу псы зэрамыгъуэтым теухуауэ цIыхухэр зэрытхьэусыхэр.
«А Iуэхум кIэлъыплъыпхъэщ икIи ап­хуэдэ дэтхэнэ зы мыарэзыныгъэри зэхэгъэкIауэ хэкIыпIэ къыхуэгъуэтын хуейщ», - къыхигъэщхьэхукIащ КъБР-м и Iэтащхьэм. ЩIыналъэм и УнафэщIым зыхуэфащэ IэнатIэхэм пщэрылъ ящищIащ псыр гуэшыныр зи къалэн IуэхущIапIэхэм я лэжьыгъэр къы­зэрызэгъэпэща щIыкIэр щIыналъэ псоми къыщапщытэну.
ЗэIущIэм къыщыхагъэщащ зэIузэпэщ ящIыну щIыпIэхэр гъэбелджылыным теу­хуа Урысейпсо IэIэтым нэхъ жыджэру ­хэтхэм Къэбэрдей-Балъкъэрыр зэращы­щыр. 2022 гъэм зыхуей хуагъэзэну щIы­пIибл къыхахын хуейщ. КъБР-м и Iэтащ­хьэ КIуэ­кIуэ Казбек гулъытэ хэха хуищIащ IэIэтыр зэфIэкIа нэужь абы кърикIуахэм япкъ икIэ зэгурыIуэныгъэхэр зэщIылIэным щIадзэн зэрыхуейр, лэжьыгъэхэм нэхъ пасэу яужь ихьэн хуэдэу.