Къэбэрдей-Балъкъэр Республикэм 11-нэ классыр къыщызыуха ныбжьыщIэ мини 4-м щIигъум я иужьрей уэзджынэр накъыгъэм и 22-м кърагъэуащ. А Iуэхур Iэтауэ зыгъэлъэпIахэм ящыщщ Налшык къалэм дэт курыт школ №33-р.
КъызэIуахагъащIэ курыт еджапIэм (2020 гъэм и фокIадэм) иужьрей уэзджынэр иджы япэу къыщызууауэ аращ. Абы къыщIигъэкIащ класси 3 - псори зэхэту щIалэгъуалэ 68-рэ щеджэу.
Iуэхум зыкърагъэхьэлIат КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщIым и япэ къуэдзэ Къуныжь МуIэед, Налшык къалэм и щIыпIэ администрацэм и Iэтащхьэм и къуэдзэ Атмурзаевэ Земфирэ, нэгъуэщIхэми.
Школыр къэзыуххэр гъуэгу дахэ теувэну ехъуэхъуащ КъБР-м и Парламентым и УнафэщIыр:
- Нобэ иужьрей уэзджынэр къыфхуеуэнущ. Зы лъэныкъуэкIи ар узэрыгушхуэн Iуэхущ, дяпэкIэ балигъ гъащIэм фыхохьэри. НэгъуэщIу уегупсысмэ, а махуэм нэщхъеи уещI, илъэс 11-кIэ узыщIэса школыр къэбгъэнэн хуейщи. Мы махуэшхуэр дэтхэнэ еджакIуэми, абы и адэ-анэми, егъэджакIуэми я гум къонэ. Курыт еджапIэ №33-м дежкIэ нобэрей махуэр псом нэхърэ нэхъыщхьэщ - япэу ныбжьыщIэхэр щIегъэкI. Фи гъащIэм мыхьэнэшхуэ щызиIэну зы Iыхьэр нобэ къызэвнэкIыу жыпIэ хъунущ, ауэ школым щывгъэкIуа илъэсхэр щIэх-щIэхыурэ фи гуапэу фигу къэвгъэкIыжынущ. ИпэкIэ уплъэмэ, гъэунэхуныгъэ куэд къыфпэщылъщ, псом япэу жэуаплыныгъэ ин зыпылъыр экзаменхэрщ. Си фIэщ мэхъу абыхэм дэтхэнэри фыпхыкIыфыну. Иужьрей уэзджынэр иджыри нэгъуэщI зым и нэщэнэщ - ар фи къэкIуэнур щывубзыху пIалъэр къызэрысам и щыхьэту аращ. Сыт хуэдэ ар хъунуми зэлъытар фэращ. Нэхъыщхьэ дыдэр - фи гъуэгу, насып къэвгъуэтыжынырщ, фызыщIэхъуэпсхэр зэвгъэхъулIэнырщ. Зэи фымыдзыхэ, фыкъимыкIуэт. Сынывохъуэхъу лъагапIэхэм фылъэIэсыну, фи цIэ-унэцIэхэр щIэныгъэ щызэвгъэгъуэта курыт школым и тхыдэм къыхэнэну.
Егоровэ Татьянэ фIыщIэ псалъэхэмкIэ захуигъэзащ школакIуэхэм я егъэджакIуэхэми, я адэ-анэхэми.
- Балигъ гъащIэм фыхыхьэным зымащIэщ иIэжыр. Зыуэ щыт къэрал экзаменхэр къывэхъулIэну си гуапэщ, абы игъэбелджылынущ здэвунэтIыну гъуэгуанэр. Фи хъуэпсапIэхэр Тхьэм къывигъэхъулIэ! - жиIащ Къуныжь МуIэед.
НыбжьыщIэхэм захуигъэзащ курыт школым и унафэщI Бланыхь Казбеки:
- Нобэ зэрыжаIащи, иужьрей уэзджынэр къыщеуэ махуэм сабиигъуэр къызывонэкIри, зэрыхабзэу, балигъ гъащIэм фыхыхьэу аращ. Сэри сынывохъуэхъу экзаменхэр къывэхъулIэну, адэ-анэхэр къызэрыфщыгугъ псомкIи арэзы фщIыну. Курыт школым фи къэухьым зыщиужьауэ, ныбжьэгъу пэжхэр щызэвгъэгъуэтауэ къыщIэкIыну ди гуапэщ.
Махуэшхуэм утыкур ягъэбжьыфIащ школым и езанэ классым щIэтIысхьэну цIыкIухэм. ЕджапIэр къэзыуххэм гулъытэу ягъуэтамрэ щIэныгъэу къратамкIэ зэрыарэзыр къыхэщу, фIыщIэ хуащIащ егъэджакIуэхэми школ унафэщIми.
НыбжьыщIэхэм вальсыр ягъэзэщIа нэужь, иужьрей уэзджынэр игъэзууну хуагъэфэщащ 11-нэ классыр къэзыух Дидан Аслъэнрэ езанэ классым щIэтIысхьэну Нэхущ Салинэрэ.
ГуфIэгъуэ Iуэхугъуэхэр зэфIэкIа нэужь, хьэщIэхэм курыт школым зыщрагъэплъыхьащ, еджакIуэхэм зыщагъасэ пэшхэр, я шхапIэр, псыгуэныр зыхуэдэм зыщагъэгъуэзащ.
