Къумалы къойланы бла эчкилени Минеральные Воды шахарда бардырылгъан Битеуроссей кёрмючюнде КъМР-ни эл мюлк министри Хасан Сижажев, «Дамате» агрохолдингни регионлада айнытыу жаны бла вице-президенти Андрей Григоращенко бла тюбешгенди. Ушакъда сёз малчылыкъда, ол санда къойчулукъда да, инвестициялы проектлени тамамлауну юсюнден баргъанды, деп билдиргендиле министерстводан.
«Къумалы малчылыкъны айнытыу, сютлю эмда этли малладан илмугъа таянып бютюнда хайырлы тёлю алыу жумушла республиканы башчыларында энчи контрольда турадыла. КъМР-ни Башчысыны - Казбек Коковну - Парламентге Посланиясында эл мюлкню бу сферасына энчи магъана берилгенди. Бизни къыралда къой эт чыгъарыу жаны бла «Дамате» эм уллу компанияладан бирине саналады. Биз аны келечиси бла Казбек Валерьевични буйругъу бла тюбешгенбиз. Быллай байламлыкъгъа алада, бизде да барды сейир. Нек дегенде, республиканы бийик качестволу продукция чыгъарыргъа бар онглары барды», - дегенди министр.
Сагъынылгъан агрохолдингни вице-президенти алада болгъан онгланы юсюнден хапарлагъанды. «Россейде бизни компанияны производстволу объектлерини асламысына, техника эмда инновацияла жаны бла тенг болгъан конкурент жокъду. Информациялы технологияланы, жалгъан интеллектни холдинг кенг хайырланады.
Производствода биология эмда санитария жаны бла къоркъуусузлукъгъа, продукцияны качествосуна уллу магъана бериледи. Компания бардыргъан проектле кёбюсюнде къумалы иш, малланы багъыу, эл мюлк продукцияны жарашдырыу, сервис жумушланы тамамлау бла байламлыдыла. Къабарты-Малкъар Республикагъа сейирибиз уллуду. Бу тюбешиу эки жанына да магъаналы байламлыкълагъа келтирлигине ышанабыз», - деп чертгенди Андрей Григоращенко.
Аны ахыргъы сёзлерине Хасан Сижажев да шагъатлыкъ этгенди. Агропромышленность сферада быллай проектлеге бизни республикада не жаны бла да билеклик этерге хазыр болгъанларын белгилегенди.