Тюнене Нальчикде КъМР-ни Башчысы Казбек Коков Къабарты-Малкъар Республикада Терроризмге къажау комиссияны бла Оператив штабны жыйылыуларын бардыргъанды. Анда билим бериуню объектлерин къоруулауну эмда жаш тёлюню аманлыкъдан сакълауну амаллары сюзюлгендиле. Жыйылыугъа КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, КъМР-де баш федерал инспектор Тимур Макоев, право низамны сакълаучу ведомстволаны бла кюч структураланы таматалары, районланы бла шахарланы администрацияларыны башчылары къатышхандыла.
Сюзюуню башлай, Къабарты-Малкъарны оноучусу Татарстанда болгъан бушуулу ишден сора Терроризмге къажау миллет комитет аманлыкъ ишлени болдурмау жаны бла мадарланы кючлендиргенин, ол санда жаш адамланы аманлыкъчылыкъдан тыйыугъа энчи эс бургъанын, билдиргенди. Казбек Коков билим бериу учрежденияланы аллай къоркъуудан сакълар ючюн НАК этерик мадарланы планы бла да шагъырейлендиргенди. Андан сора да, жаш адамланы арасында зорлукъ, огъурсузлукъ дегенча къылыкъла жюрюмез ючюн не этерге кереклисине къаралгъанды, окъуу юйледе психологланы санын кёбейтирге кереклисини юсюнден айтылгъанды.
Жыйылыуда докладла бла РФ-ни Миллет гвардиясыны аскерлерини федерал службасыны управлениясыны таматасы Сергей Васильев, КъМР-ни жарыкъландырыу, илму эмда жаш тёлюню ишлери жаны бла министри Анзор Езаов, КъМР-де ич ишлени министри Василий Павлов да сёлешгендиле. Ахырында сюзюуню эсеплерине кёре тийишли оноула этилгендиле, жарыкъландырыу министрге уа республиканы окъуу юйлерин террорчулукъдан къоруулауну мадарлары къалай толтурулгъанларын энчи контрольда тутаргъа буюрулгъанды.