КIуэкIуэ Казбек «Урысей зэкъуэт» партым и ХVIII съездым и лэжьыгъэм хэтащ
Ди республикэм и делегацэр «Урысей зэкъуэт» партым и ХVIII съездым щыIащ. А зэIущIэшхуэм щыхэплъащ дызыхэт илъэсым кърикIуахэмрэ партым адэкIэ къыпэщыт къалэнхэмрэ.
Съездым и пленар зэIущIэм къыщыпсэлъащ Урысейм и Президент Путин Владимир. Абы къыхигъэщхьэхукIащ цIыхухэм я псэукIэр егъэфIэкIуэнымкIэ, къэралым и суверенитетыр гъэбыдэнымкIэ, экономикэм зегъэужьынымкIэ, Урысейм иджыпсту къыпэщыт къалэн инхэр тэмэму гъэзэщIэнымкIэ партым жэуаплыныгъэшхуэ къызэрыбгъэдэхуэр.
Къэралым и Iэтащхьэм гулъытэ хэха хуищIащ щIыналъэхэм я Iуэхухэр зэрекIуэкIым. «Урысей зэкъуэт»-м и дэIэпыкъуныгъэ ямыгъуэтмэ, щIыналъэхэми муниципалитетхэми я Iуэхур дэкIынукъым. Дэ ар нэгъэсауэ къыдгурыIуэн икIи псоми ди зэхуэдэ мурадхэмрэ къалэнхэмрэ быдэу дызэщIэгъэуIуауэ делэжьын хуейщ», - жиIащ абы.
Путин В. В. къызэрилъытэмкIэ, партым иригъэкIуэкI лэжьыгъэм и унэтIыныгъэ нэхъыщхьэ дыдэхэм ящыщщ цIыхухэм япыщIауэ щытыныр. «Iэмал имыIэу цIыхухэм яхыхьэн, къекIуэкI псори абыхэм зэIухауэ ягурыгъэIуэн, къащта сыт хуэдэ унафэми ди къэралымрэ ди зэманымрэ я дежкIэ яIэ мыхьэнэр яхузэпкърыхын хуейщ», - къыхигъэщхьэхукIащ Президентым.
«Урысей зэкъуэт» партым и Iэтащхьэ, УФ-м и Правительствэм и УнафэщI Медведев Дмитрий зэрыжиIамкIэ, политикэ мурадхэр, къыхуеджэныгъэ- хэр, лэжьэкIэр къэгъэщIэрэщIэжын хуейщ, сыту жыпIэмэ, сыт хуэдэ политикэ къаруми и ехъулIэныгъэхэм я лъабжьэр абы зэпымыууэ зихъуэжын зэрыхузэфIэкIырщ.
ХVIII съездым и пленар зэIущIэм къыщащтащ «Урысей зэкъуэт» партым и Уставым зэхъуэкIыныгъэхэр хэлъхьэным, партым и орган нэхъыщхьэхэм я унафэщIхэм щыщхэр зэхъуэ-кIыным теухуа унафэ.
КъБР-м и Iэтащхьэмрэ Правительствэмрэ я пресс-IуэхущIапIэ.