Къабарты-Малкъар къырал аграр университетде «Тарых магъаналы эсгериу» проектге тийишлиликде «Ёмюрлюк махтаулукъну бетлери» деген IХ битеуроссей илму-практика конференция ётгенди. Анга Чечен Республикада, Дондагъы Ростовда, Краснодар крайда университетлени, Юг Федерал къырал бийик окъуу юйню келечилери да онлайн халда къатышхандыла. Алагъа бу жол Москвада С.Ю.Витте атлы университет эмда Душанбеде Орус –таджик (Славян) университет къошулгъанларын да белгилерчады.
Конференцияны Россей Федерацияны Культура министерствосу, КъМР-ни Жарыкъландырыу, илму эмда жаш тёлюню ишлери жаны бла министерствосу, Искусстволаны Шимал-Кавказ къырал институтуну, КъМКъУ-ну, КъМКъАУ-ну да себепликлери бла «Патриот» жамауат организация къурагъанды.
Жыйылыуну СКГИИ-ни профессору, филология илмуланы доктору, «Патриот» жамауат организацияны таматасы Эфендиланы Фуад ачханды. Ол илму-практика конференция Уллу Хорламны Совет Союзну адамлары келтиргенине ёсюп келген тёлюню тюшюндюрюр, ала Ата журтну сюерча, тарыхыны тюзюн билирча, аны багъаларча этер мурат бла къуралгъанын чертип айтханды.
КъМКъАУ-ну илму иш жаны бла проректору Рустам Абдулхаликов Уллу Ата журт урушну тарыхына жораланнган бу проект тюрлю-тюрлю майданлада бардырылгъанын, быйыл кезиу Къабарты-Малкъар къырал аграр университетге жетгенин эсгергенди. Аны уллу даражагъа санап, конференцияны къурагъанлагъа жюрек ыразылыгъын билдиргенди.
-Бу ишге кёпден-кёп жаш адам къатышханы да махтаулуду. Быллай ахшы тёре кёп жыллагъа сакъланыр деп ышанама»,-дегенди проректор.
Тюзюнлей эфирде болгъан ректорла, преподавательле да сёлешгендиле, бу ишни магъанасы уллу болгъанын чертгендиле, аны андан ары бардырыргъа себеплик этерге да айтхандыла.
Андан сора залда олтургъан эмда видео бла байламлыкъгъа чыкъгъан студентлени да бир къаууму докладла этгендиле. Аланы араларында КъМКъАУ-ну биринчи курсуну студентлери Къудайланы Айша, Мурачаланы Салима, Асанланы Аминат, КъМКъУ-ну студенти Кючюкланы Мариям, Сабий чыгъармачылыкъны «Кюн шахар» академиясыны «Жилтин» адабият студиясындан 11-жыллыкъ Шауаланы Милана, Чеченде къырал университетде окъуй тургъан Цораланы Танзиля, Текеланы Патимат, дагъыда кёп башхала да бар эдиле. Ала Уллу Ата журт урушну юсюнден аппалары, ынналары айтхан хапарланы къагъытха салгъандыла, кёп архив материалланы бетлерин ачхандыла. Урушну сабийлерини, ол къыйын жыллада тылда уруннган аналаны, жаш къызчыкъланы да эсгериулерин да юлгюге келтиргендиле.
Докладла Уллу Ата журт урушну юсюнден керти хапарлада мурдорланнганлары ючюн бютюнда багъалыдыла. Нек дегенде авторла урушха къатышхан адамланы атларын, тукъумларын, жыл санларын да туура этедиле.
Конференцияны ишине республикада баш къырал налог инспектор Адам Нахушев да къатышханды. Ол къызы Диана бла бирге кишиликлери ючюн къырал саугъала бла белгиленнген, алай бир тюрлю сылтаула бла аланы алмай къалгъан кёп аскерчини атларын туура этгенди, аланы бир- бирлерини асыралгъан жерлерин тапханды. Ма ол ишни къалай бардыргъаныны юсюнден айтып, мындан ары да къызы, кеси да аны тохтатмазлыкъларына жыйылгъанланы ышандыргъанды. Жаш адамланы уа Хорламны келтирир ючюн ата-бабаларыбыз къанларын-жанларын аямагъанларын бир заманда да унутмазгъа эмда тарыхны тюзюн билир ючюн а быллай илму-практика конференциялагъа къатыша турургъа чакъыргъанды.
Сабий чыгъармачылыкъны «Кюн шахар» академиясыны «Жилтин» адабият студиясындан къызла бла жашла уа уруш жыллада жазыучу жерлешлерибизни кишиликлерини юсюнден айтхандыла, чыгъармаларын окъугъандыла.
Ахырында конференциягъа къатышханланы хар бирине да «Ёчюлмезлик махтаулукъну бетлери» деген китапла саугъагъа берилгендиле.
