Къабарты-Малкъарны Жамауат палатасында «Биринчи медико-санитар болушлукъ бериуню айнытыу» деген регион проектни тамамлау тинтилгенди. Жыйылыуну ача, махкемени башчысы Хазратали Бердов Россейни Президенти миллет эм регион проектлени толтуруугъа контрольну бардырыргъа палаталагъа буюргъанын эсгертгенди.
Социал политика, саулукъ сакълау эм экология жаны бла комиссияны таматасы Галина Егорова чертгенича, проектде салыннган борчланы толтуруу врачлагъа, пациентлеге да хайырлы боллукъду. Нек дегенде багъыу учрежденияланы шёндюгюлю техника бла жалчытыу ауругъанланы регион эм федерал аралагъа жибермегенлей, жер-жерледе тынгылы къараргъа себеплик этерикди.
Аны бла бирге медицина ишчилени хакълары тийишлисича ёлчемледе берилирге керекдиле. Жангыз да техниканы юсю бла качестволу медицина болушлукъну жалчытыуну проблемасын тамамларгъа онг жокъду, дегенди ол.
Республиканы Саулукъ сакълау министерствосуну абадан адамлагъа медицина болушлукъну къурау жаны бла бёлюмюню башчысы Инна Мамхегова терк медицина болушлукъ этиуню игилендирирге жаланда амбулатор-поликлиника службаны ишин айнытыу бла байламлыкъда боллугъун чертгенди. Ол айтханыча, былайда кюндюзгю стационарланы бла адамлагъа юйлеринде багъыу ишлерине да къараргъа керекди.
Биринчи медико-санитар болушлукъ бюгюнлюкде 8 ара район болницада, районла аралы кёп профильли багъыу махкемеледе, 2 участка учрежденияда, аланы къауумларында 89 амбулаторияда, 34 фельдшер-акушер эм 14 фельдшер пунктда этиледи. Хар элде медицина учреждение барды, аладан ауругъанланы ара больницалагъа 30-40 минутну ичинде жетдиредиле, дегенди ол.
Битеу медицина организацияла связь каналлагъа къошулгъандыла, алада информация къоркъуусузлукъ сакъланады, келген данныйлени тинтирча ара къуралгъанды. Проектни тамамлаугъа 2020 жылда федерал не республика бюджетледен ахча бёлюнмегенди, ол борчлу халда медицина страхование этиу фондну себеплиги бла учрежденияланы кеслерини ахчаларына толтурулгъанды.
Бардыргъан ишлерини юсюнден докладны министерствону медико-санитар болушлукъ этиу регион арасыны башчысы Курданланы Оксана этгенди. Алай бла бюгюнлюкде ала Бахсан, Терк, Чегем, Черек районланы ара эм районла аралы кёп профильли больницалагъа 5 флюограф, Прохладна шахарны эм районну больницаларына бла Урван эм Лескен районлада саусузлагъа къарагъан районла аралы багъыу махкемелеге 2 маммограф алырча келишимле тауусулгъандыла. Ала быйыл май-июнь айлада келтирилликдиле деп сакъланады.
Дагъыда бир магъаналы келишимни Санитар авиацияны миллет службасы бла тауусургъа белгиленеди. Бусагъатда аны ючюн техника излемле толтурула турадыла, учууну расписаниясы тохташдырылады. Проектни паспортунда 2021 жылгъа 16 кере учаргъа план салыннганды. Андан тышында, битеулю медицина страхование этиу фондну, страховой компанияланы эм медицина учрежденияланы ахчаларына профилактика къараула эм халкъны диспансеризациясы ётерикдиле.
Медицина болушлукъ этиуню жангы системасы адамлагъа врачха кезиулерин сакълай кёп заманны къоратмазларына, докторгъа жазылыуну женгиллендирирге болушурукъду. Шёндю ол 27 поликлиникада бла 17 башха медицина организацияда кийирилгенди.
Докладлагъа тынгылай, палатаны членлери талай кемчиликлеге эс бургъандыла. Сёз ючюн, Россейни жамауат палатасыны келечиси Заурби Нахушев республикада жангы араны къурау ахшы башламчылыкъ болгъанын, алай аны билимли кадрла эм машина бла жалчытыргъа кереклисин чертгенди. Медицина ишчилеге хакъларын тёлеу, ол заманында берилгени бла къалгъаны эм ёлчеми да соруула туудургъанды. Ахырында жыйылгъанла республиканы Правительствосуна, сейирлери болгъан органлагъа бла организациялагъа эсгертиуле жарашдыргъандыла.
